.png)
Gazeta Si - Më 1 tetor, katër goma të avionit “Boeing” u çanë kur u ulën në aeroportin e Bergamos, Itali. Më 3 tetor, ndodhi një tjetër incident, ku u bë evakuimi i të gjithë pasagjerëve dhe ekuipazhit të kabinës duke përdorur rrëshqitës të fryrë për shkak të zjarrit në motorin e një “Boeing”-u tjetër pak para nisjes nga Brindisi. Dy raste në tre ditë në Itali, me “protagonist” kompaninë “low cost” të “Ryanair”-it.
Dhe një dosje hetimi e dyfishtë është hapur nga Agjencia Kombëtare e Sigurisë së Fluturimeve, e cila do të duhet të sqarojë dinamikën dhe të identifikojë shkaqet.
1)A kanë lidhje dy incidentet e “Ryanair”?
Jo. Dinamika, modelet e avionëve të përfshirë dhe gjithashtu zonat që kanë pasur probleme janë të ndryshme.
Në incidentin e Bergamos - që rezultoi në mbylljen e aeroportit për rreth dhjetë orë - përfshiu një “Boeing 737 Max” (avion i gjeneratës së fundit), i cili pësoi problematikë gjatë uljes. Në Brindizi, avioni ishte një “Boeing 737” (klasik) dhe po përgatitej për ngritje.
2)Por a janë dy rastet një shenjë e një problemi mirëmbajtjeje?
Për momentin, çdo hipotezë do të ishte thjesht spekulative. Pasi të kenë përfunduar dy hetimet nga Agjencia Kombëtare e Sigurisë së Fluturimeve (ANSV), do të mund të kemi një ide të qartë të shkaqeve, të cilat, për momentin duken të ndryshme për dy incidentet.
ANSV do të jetë gjithashtu përgjegjëse për të kuptuar nëse, midis shpjegimeve të ndryshme, ka diçka që lidhet me mirëmbajtjen ose trajnimin e pilotëve.
3)A është e vërtetë që uljet në pistë të “Ryanair” janë "më të vështira" se ato të avionëve të tjerë?
Është një vëzhgim që bëjnë shumë njerëz. Ata që punojnë në brendësi, sqarojnë se kjo ka të bëjë më shumë me modelin e avionit të përdorur dhe gjithashtu me llojin e manovrimit.
“Boeing 737” i përdorur nga “Ryanair”, është një avion i cili, sipas ekspertëve, është i përshtatshëm për të pasur ndikim më të madh në tokë gjatë uljes.
Sipas pilotëve, evolucioni i tij, “737 Max”, kërkon frenim më të madh dhe kjo e bën kontaktin me pistën të ndohet më shumë.
4)Dhe çfarë roli ka trajnimi i pilotëve në këtë rast?
Në mbarë botën ka “shkolla” të ndryshme. Pilotët italianë, për shembull, janë të famshëm për faktin se janë mes atyre që zbarkojnë në mënyrën më "të butë" të mundshme, edhe në situata moti më pak se të favorshme.
Drejtuesit e trajnuar diku tjetër, për shembull në Britaninë e Madhe, priren të kenë një qasje “më të ashpër” në pistë, por gjithmonë në mënyrën më të sigurt të mundshme.
5)A mund t’i shkaktojë probleme avionit një ulje e vështirë?
Sigurisht. Në shumicën e rasteve kur ndodh kjo, pjesa që mban bazamentin e gomave, prishet. Ose vetë gomat shpërthejnë ose konsumohen, duke u bërë të papërdorshme.
Në rastin e Bergamos, megjithatë, një analizë fillestare e pasojave tregon se shkaku mund të ketë qenë diçka tjetër, jo një zbritje e ashpër "e thjeshtë".
6)Po çfarë ndodhi në Brindizi?
Edhe në këtë rast, nga gjetjet e para duket se ka ndodhur i ashtuquajturi “zjarr i shkarkimit”, pra një zjarr në tubin e shkarkimit.
Regjistrohet në pjesën e pasme të motorit dhe zakonisht lëshohet në tokë gjatë ndezjes ose ndalimit të motorit. Një nga shkaqet kryesore është karburanti i tepërt në dhomën e djegies ose zonën e turbinës.
7)A kishin të drejtë pilotët në Brindizi për të evakuuar njerëzit me dalje emergjence?
Lëvizja vihet në dyshim nga më shumë se një komandant i konsultuar nga "Corriere della Sera". Duke qenë se nuk ishte një zjarr i rrezikshëm dhe për rrjedhojë në mungesë të flakëve që mund të arrinin në kabinë, sipas tyre nuk ishte nevoja të aktivizoheshin dyshekët rrëshqitës të emergjencës për zbarkimin e pasagjerëve.
"Nuk mund të evakuohen 180 njerëz përmes dyshekëve rrëshqitës, është e rrezikshme dhe shumë njerëz mund të lëndohen", - shpjegon një komandant.
8)A kushton shumë aktivizimi i dyshekëve rrëshqitës të emergjencës?
Sipas shifrave të mbledhura për një “Boeing 737”, aktivizimi i secilës rrëshqitëse emergjence kushton rreth 65 mijë euro.
9)Sa i sigurt është “Ryanair”?
Për aq kohë sa ka ekzistuar dhe ka fluturuar - mbi 39 vjet - linja ajrore irlandeze me kosto të ulët nuk ka pasur asnjë aksident fatal, pra ngjarje në të cilat dikush në bord ka humbur jetën. Konsiderohet ndër dhjetë kompanitë më të sigurta në botë.
10)Por dy incidente në tre ditë, duken si një thirrje për rizgjim
Do të duhet të priten rezultatet e dy hetimeve të ANSV. Në çdo rast, duhet të vendosim gjithçka në këndvështrimin e duhur: “Ryanair” është kompania që kryen më shumë fluturime në Evropë dhe - në varësi të ditës - e katërta ose e pesta në botë.
Nga data 1 janar deri më 2 tetor të këtij viti, sipas të dhënave të siguruara nga “Eurocontrol”, ajo ka kryer mesatarisht 3.129 ngritje çdo ditë. Më shumë se “EasyJet” (e dyta) dhe kompania “Turkish Airlines” (e treta) së bashku.
11).Sa avionë ka “Ryanair”?
Sipas të dhënave më të fundit, grupi irlandez - i cili gjithashtu kontrollon divizionet angleze (“Ryanair” MB), Malta (“Malta Air” dhe “Lauda Europe”) dhe polakja (“Buzz”) - ka 607 avionë në flotën e tij: 1 “Boeing 737-700” (me 148 vende), 409 “Boeing 737-800” (189 vende), 170 “Boeing 737 Max 8” (me 197 vende) dhe 26 avionë “Airbus A320 (me 180 vende).
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
