Rusia po ecën përpara me planet për të ndërtuar një tubacion masiv që transporton gaz natyror në Kinë pasi sanksionet perëndimore po mbysin ekonominë e saj.
Gazprom, gjigandi energjetik i kontrolluar nga Kremlini, tha se kishte nënshkruar një kontratë për të kryer punë projektimi dhe studimi si pjesë e ndërtimit të gazsjellësit Soyuz Vostok.Tubacioni i propozuar do të dërgojë deri në 50 miliardë metra kub, ose 1.8 trilion këmbë kub, gaz natyror rus çdo vit në Kinë nëpërmjet Mongolisë.
Bloomberg raportoi se nëse planet për tubacionin do të realizoheshin, mund të ishte marrëveshja më e madhe e Gazprom-it me Kinën.
Vendet dhe blloqet tregtare, duke përfshirë Bashkimin Europian, Britaninë e Madhe, SHBA-në, Kanadanë dhe Japoninë, i janë përgjigjur pushtimit rus të Ukrainës me sanksione të dizajnuara për të penguar ekonominë e Rusisë.
Masat kanë synuar sistemin e saj bankar dhe tregtinë, ndër fusha të tjera, dhe kanë çuar në një rënie të rublës, një rritje të madhe të normave të interesit dhe rritje të inflacionit.
Por, më e rëndësishmja, Perëndimi nuk i ka ndaluar importet ruse të energjisë. Europa merr rreth 40% të furnizimit të saj me gaz natyror nga Rusia dhe ka vazhduar të mbështetet në të që nga fillimi i pushtimit.
Kina, ndërkohë, i është shmangur kritikave për lëvizjen e Rusisë në Ukrainë dhe nuk i quajti veprimet e Moskës një pushtim. Kina është partneri më i madh tregtar i Rusisë për eksportet dhe importet, dhe bleu një të tretën e eksporteve të naftës bruto të Rusisë në vitin 2020, raportoi Reuters, duke shtuar se Kina furnizon Rusinë me produkte si telefona, lodra dhe veshje.
Lidhja Soyuz Vostok mund t’i ofrojë Rusisë një akses më të mirë në tregjet alternative në Lindje pasi kompanitë kryesore të energjisë në Perëndim njoftuan se do të heqin dorë nga interesat ruse. Shell tha të martën(2 mars) se po tërhiqej nga sipërmarrjet e saj të përbashkëta me Gazprom dhe bizneset e lidhura me to, ndërsa BP tha se po hidhte 20% të aksioneve të saj në firmën ruse të naftës Rosneft të mbështetur nga shteti.
Gjermania ndaloi gjithashtu planet për tubacionin Nord Stream 2, i projektuar për të transportuar gaz midis Rusisë dhe Europës kontinentale, megjithëse firma gjermane e energjisë E.ON tha se kishte refuzuar thirrjet për mbylljen e gazsjellësit Nord Stream 1, i cili pompon gazin natyror rus në Europë.
Bloomberg raportoi se nëse Rusia dhe Kina do të arrinin një marrëveshje të re furnizimi, Gazprom mund të ndërtojë një ndërlidhës midis sistemeve të tij të tubacioneve me drejtim perëndim dhe lindje, duke e lejuar atë të devijojë gazin nga fushat që aktualisht furnizojnë Kinën vetëm Europën.
Gazprom tha se Alexey Miller, kryetari i Komitetit të Menaxhimit të Gazprom dhe Sainbuyan Amarsaikhan, zëvendëskryeministri i Mongolisë, diskutuan projektin Soyuz Vostok në një takim.
Gazsjellësi Soyuz Vostok njihet edhe si tubacioni ‘Fuqia e Siberisë 2’. Tubacioni ‘Fuqia e Siberisë 1’ pompon gaz natyror nga Rusia në Kinë që nga viti 2019 si pjesë e një marrëveshjeje 30-vjeçare, prej 400 miliardë dollarësh, raportoi Bloomberg.
Burimi: Insider/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
