Nga Gazeta ‘Si’- Shtetet perëndimore nuk i lejuan diskutimet për fushatën bombarduese të NATO-s kundër Serbisë, në seancën e Këshillit të Sigurisë.
Rusia, aleate e ngushtë e Serbisë kishte kërkuar futjen në agjendë të pikës së emërtuar “kërcënimet ndaj paqes ndërkombëtare dhe sigurisë” më rastin e 25 vjetorit të bombardimeve, të aleancës, por SHBA, Franca dhe shtete të tjera abstenuan në votim, duke e parandaluar diçka të tillë.
Ato argumentuan se agjenda e takimit duhet të miratohej nga të gjithë anëtarët, ndërsa akuzuan Rusinë se po shfrytëzonte ngjarjen për të nxitur përçarje dhe destabilitet në Ballkanin Perëndimor.
“SHBA nuk ka asgjë për të fshehur lidhur me mbështetjen ndaj operacionit të NATO-s në vitin 1999. Veprimet ishin të nevojshme për t’i dhënë fund spastrimit etnik në Kosovë. Por diskutimet qe kërkon Rusia, kanë të bëjnë me përpjekjet e Kremlinit për të minuar stabilitetin në Ballkanin Perëndimor, për të nxitur tensionet rajonale në mënyrë që të përmbushë ambiciet e veta për destabilizim të rajonit”, tha Robert a. Wood, ambasador i SHBA.
Ambasadori rus në OKB e cilësoi ndërhyrjen ushtarake të aleancës një shkelje të madhe të ligjit ndërkombëtar dhe të kartës së OKB. Duke i quajtur luftëtarët e UÇK-së banda kriminale, ai tha se ngjarjet e asaj kohe dhe shkatërrimi i një shteti sovran sipas tij, ka çuar në situatën aktuale në Kosovë, ku gjërat janë përkeqësuar.
“Disa kolegë në Këshillin e Sigurimit do të thonë se ngjarjet e 25 viteve më parë janë histori dhe nuk kanë të bëjnë me aktualitetin. Por çdo njeri i arsyeshëm e kupton se shkatërrim i një shteti të pavarur çdo i në një kaos që po shtohet jo vetëm në Kosovë, por në të gjithë rajonin”, u shpreh Vassily Nebenzia.
Kina e cila njësoj si Rusia nuk e njeh pavarësinë e Kosovës, po ashtu përkrahu Rusinë dhe tha se ndërhyrja e NATO-s ishte shkelje e ligjeve ndërkombëtare. Përfaqësuesi i Kinës tha se gjatë fushatës ajrore të aleancës ushtarake perëndimore ishte sulmuar edhe ambasada kineze në Beograd, kur ishin vrarë edhe tre gazetarë kinezë”.
Kosova përfaqësohej nga ministrja e jashtme e Kosovës Donika Gërvalla e cila përmes një statusi në Facebook tha se Rusia ngeli e vetme në përpjekjen e saj për ta shtrembëruar të vërtetën.
Ajo tha se Kosova ka qenë e gatshme për të paraqitur faktet rreth krimeve të Serbisë.
“Të gatshme për të paraqitur para anëtarëve të Këshillit të Sigurimit faktet rreth krimeve gjenocidale të Serbisë ndaj popullatës civile në Kosovë, përshëndetëm megjithatë unitetin e partnerëve, miqve dhe aleatëve tanë për moslejimin e mbajtjes së kësaj seance propagandistike. Rusia mbeti e vetme në përpjekjet e saj të rrezikshme për ta shfrytëzuar Këshillin e Sigurimit për të shtrembëruar të vërtetën. Me vetëm 3 vota pro (mes tyre Federata Ruse) dhe 13 abstenime, iniciativa e Rusisë nuk kaloi.
Qindra masakra të tmerrshme që Serbia bëri në Kosovë, vrasja mizore e 1432 fëmijëve, përdhunimi i mijërave grave, vajzave, burrave dhe fëmijëve, zhdukja e viktimave të luftës dhe shkatërrimi i pasurisë së Kosovës ishin dhe mbeten fakt”, ka shkruar ajo në Facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
