.png)
Gazeta Si – Që nga e mërkura, qasja në WhatsApp, aplikacionin më të popullarizuar të mesazheve në botë, është bllokuar në Rusi.
Qeveria ruse është përpjekur vazhdimisht të kufizojë përhapjen e WhatsApp në vend, duke bllokuar përkohësisht aksesin ose duke ngadalësuar funksionimin e tij.
Në këto raste, kompania amerikane që zotëron aplikacionin, “Meta”, është akuzuar gjithmonë për shkelje të ligjeve lokale mbi komunikimin në internet.
Megjithatë, tani, WhatsApp është hequr nga lista e faqeve të aksesueshme. Nuk ka pasur asnjë deklaratë zyrtare nga autoritetet ruse në lidhje me arsyen e bllokimit.
Në vitin 2022, Rusia e shpalli “Meta”-n një organizatë terroriste dhe kishte bllokuar tashmë përdorimin e dy prej rrjeteve sociale të grupit, Facebook dhe Instagram, në vend.
Deri më tani, vetëm WhatsApp mbeti aktiv. Bllokimi u vendos një ditë pasi autoritetet ruse kufizuan aksesin në një tjetër aplikacion të popullarizuar të mesazheve, Telegram, duke e akuzuar atë se nuk po bënte mjaftueshëm për të mbrojtur të dhënat personale të përdoruesve.
WhatsApp komentoi ndalimin e Rusisë në një deklaratë, duke thënë: “Sot, qeveria ruse u përpoq ta bllokonte plotësisht WhatsApp-in në një përpjekje për t’i drejtuar përdoruesit drejt një aplikacioni mbikëqyrjeje në pronësi të shtetit.
Përpjekja për të izoluar mbi 100 milionë njerëz nga komunikimet private dhe të sigurta, është një hap prapa dhe mund të çojë vetëm në më pak siguri për njerëzit në Rusi.”
Aplikacioni i mbikëqyrjes i përmendur në deklaratë është MAX, një shërbim alternativ mesazhesh i zhvilluar me urdhër të qeverisë ruse, i cili është instaluar në të gjithë telefonat celularë, tabletët dhe televizorët inteligjentë të shitur në Rusi që nga fillimi i shtatorit.
Krahasuar me aplikacionet e tjera, MAX ka rregulla shumë më pak të rrepta për mbrojtjen e të dhënave: sipas disa ekspertëve dhe disidentëve, qeveria dëshiron ta përdorë atë për të monitoruar bisedat private të qytetarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
