Rusia feston fitoren në Bakhmut, Zelenski: Qyteti është vetën në zemrat tona

Gazeta Si – Rusia ka shpallur fitoren në Bakhmut, qytet në lindje të Ukrainës, ndonëse zyrtarët ukrainas pretendojnë se luftimet vazhdojnë, shkruan Radio Evropa e Lirë.

Presidenti ukrainas Volodymyr Zelensky, më 21 maj, në Japoni, tha se pak ka mbetur nga Bakhmuti dhe se qyteti është shkatërruar pothuajse plotësisht.

I pyetur nëse Bakhmuti ishte nën kontrollin e Ukrainës, Zelensky nuk ishte plotësisht i qartë, por tha: “Mendoj që jo”, gjë që u interpretua si konfirmim i humbjes së Bakhmutit.

“Sot, Bakhmuti është vetëm në zemrat tona”, tha Zelensky në Hiroshimë, ku ishte i ftuar në samitin e grupit G7, ku morën pjesë liderët e vendeve më të zhvilluara ekonomikisht në botë.

Megjithatë, zyra e presidentit ukrainas më vonë sqaroi se Zelensky nuk deklaroi se qyteti kishte “rënë”.

Zëdhënësi i presidentit ukrainas, Sergiy Nykyforov, mohoi pretendimet se Bakhmuti kishte rënë në duart e forcave ruse.

Ai i tha CNN-it se përgjigja e Zelenskyt, “mendoj që jo”, i referohej pretendimeve ruse se ata kishin pushtuar qytetin.

“Presidenti mohoi që Bakhmut ishte marrë”, tha Nykyforov.

Deklarata e presidentit ukrainas vjen disa orë pasi Ministria ruse e Mbrojtjes njoftoi se forcat e ushtrisë private Wagner, të mbështetura nga trupat ruse, kishin marrë Bakhmutin.

Themeluesi i Wagner-it, Yevgeny Prigozhin, më herët publikoi një video duke pretenduar se forcat e tij kontrollonin të gjithë qytetin, megjithëse qeveria ukrainase e mohoi shpejt këtë.

Presidenti rus Vladimir Putin ka uruar ushtarët “për pushtimin e qytetit”, me mesazhin se më të merituarit do të shpërblehen, njoftuan agjencitë ruse të lajmeve.

Këto pretendimet vijnë pasi Ukraina thuhet se realizoi përparim të prekshëm në fushën e betejës, në rrethet në veri dhe në jug të Bakhmutit.

Këto pretendime, gjithashtu, vinë në kohën kur Ukraina po përgatitet për një kundërofensivë, e cila pritet në një ose më shumë lokacione përgjatë vijës së betejës, e cila është e gjatë më shumë se 1.000 kilometra.

Zyrtarët perëndimorë vlerësojnë se numri i ushtarëve rus të vrarë dhe të plagosur në Bakhmut , sillet ndërmjet 20.000 dhe 30.000, ndërsa edhe ushtria ukrainase gjithashtu pagoi një çmim të rëndë./REL/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.