Rusia fal një nga autorët e vrasjes së gazetares. U dënua me 20 vjet burg, por luftoi në Ukrainë!

Gazeta Si – Ende nuk ka paqe dhe drejtësi për Anna Politkovskayan. Ish-hetuesi rus, Sergey Khadzhikurbanov, i dënuar për vrasjen e gazetares ruse në vitin 2006, u fal, pasi mori pjesë në “operacionin special ushtarak” në Ukrainë, detyrë për të cilën nënshkroi një kontratë me Ministrinë e Mbrojtjes Ruse.

Lajmi u publikua sot në mëngjes nga disa media ruse dhe u mor nga mediat ukrainase, sipas të cilave, pas gjashtë muajsh në front, Khadzhikurbanov ka zgjatur kontratën me Ministrinë ruse të Mbrojtjes, sipas “Baza”-s, edhe pse nuk ka detaje të tjera.

Lajmin e konfirmoi avokati Aleksey Mikhalchik për agjencinë e lajmeve franceze, AFP. “Khadzhikurbanov mori pjesë në operacionin special si i burgosur, më pas u fal dhe tani merr pjesë si ushtar civil, pasi ka nënshkruar një kontratë me Ministrinë e Mbrojtjes. Ai ka punuar në forcat speciale në vitet ’90, ka përvojë dhe ndoshta për këtë i është ofruar menjëherë një post komandimi”, tha ai.

Që në muajt e parë të pushtimit të Rusisë, të burgosurit, të cilëve më pas iu dha falja, u rekrutuan nga kompania “Ëagner” dhe ushtria e rregullt. Anna Politkovskaya u vra më 7 tetor 2006 në Moskë, në ashensorin e ndërtesës ku ajo jetonte.

Ajo ishte një gazetare ruse e “Novaya Gazeta”, e njohur për raportimet e saj në Çeçeni, e cila ishte shumë kritike ndaj qeverisë ruse dhe për hetimet e saj për korrupsionin në politikë.

Presidenti rus Vladimir Putin nuk e ka fshehur kurrë se e ka konsideruar atë armike. Në tetor 2002, gazetarja mori pjesë në negociatat me terroristët çeçenë që kishin marrë peng njerëz në teatrin Dubrovka në Moskë gjatë një shfaqjeje.

Në pranverën e vitit 2004, kur nxënësit e Beslanit u morën peng, ajo u thirr për të ndërmjetësuar, por u helmua në avion.

Në gjyqin e tij të parë në 2007, Khadzhikurbanov u lirua nga akuza për organizimin e vrasjes së Politkovskayas, por më vonë u arrestua përsëri dhe u akuzua për zhvatje të parave nga Dmitry Pavlyuchenkov, një nga njerëzit e tjerë të dënuar dhe akuzuar për bashkëpunim në vrasje, megjithëse refuzoi të dëshmonte në gjykatë.

Khadzhikurbanov është deklaruar gjithmonë të pafajshëm, por është dënuar me 20 vjet. Në vitin 2014, një gjykatë në Moskë e dënoi Rustam Makhmudov dhe Lom-Ali Gaytukaev me burgim të përjetshëm për kryerjen dhe organizimin e vrasjes.

Khadzhikurbanov dhe vëllezërit Ibrahim dhe Dzhabrail Makhmudov u dënuan me 20, 12 dhe 14 vjet burg për rolet e tyre në vrasjen e Politkovskayas.

Në vitin 2018, Gjykata Evropiane e të Drejtave të Njeriut vendosi se qeveria ruse “nuk e ka ekzaminuar në mënyrë adekuate se kush e ka kryer krimin”. Identiteti i atyre që urdhëruan vrasjen nuk është vërtetuar kurrë përfundimisht.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.