Ka lindur në Kanada, ka qenë 2 vjet pjesë e Barcelonës dhe tani po e rrit George Haxhi, trajneri i tij te Farul Costanza, me të cilin është bërë shënuesi më i ri në moshë në Rumani. Tani vjen edhe grumbullimi i parë me kombëtaren.
Enes Sali ka vendosur rekordin e shënuesit më të ri në moshë në Rumani, 15 vjeç e 6 muaj, me skuadrën e drejtuar nga George Haxhi, legjenda e futbollit rumun. Sali është një fantazist me kualitet, një 10-ë klasike që ka luajtur 7 ndeshje dhe ka shënuar 1 gol në nivelin elitar të futbollit rumun.
Dhe çfarë goli. Slalom në mes të dy kundërshtarëve në fushë të hapur, një vrap i lehtë në fakt para atij prej 40 metrash për të shkuar dhe për të përqafuar Haxhin. Është edhe në “top 10” të debutuesve më të rinj.
Trajneri i Rumanisë, Mirel Radoi, e ka grumbulluar për ndeshjet me Islandën dhe Lihtenshteinin, që luhen më 11 dhe 14 nëntor. Rumania është e dyta, me 13 pikë, dhe synon “play-off”-in për të shkuar në Botëror. Bashkë më djalin e Haxhit, Puscas, Alibec, Man dhe Marin, ka vend edhe për 15-vjeçarin e lindur në Toronto. Sali ka lindur në 2006-ën dhe në Instagram nuk ka as 4 mijë ndjekës.
Nëse Sali luan, do të bëhej debutuesi më i ri në kombëtaren rumune, duke i marrë rekordin Kristi Maneas (në fushë 16 vjeç kundër Shqipërisë në 2014-ën). Sali ka disa ndeshje me kombëtaren U-16, një me U-17-ën dhe asnjë me U-21-shin. Goli kundër Clincenit e ka futur në historinë e futbollit rumun, ashtu si dhe debutimi ndaj Sepsit në gusht. Sali ka luajtur për gati dy vjet në fidanishten e Barcelonës, drejtuesit e së cilës e pikasën në një turne, kur ai ishte 11 vjeç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
