Gazeta Si – Sulmuesi nuk ka pritur mirë një video të klubit në lidhje me fushatën e abonimeve për sezonin 2023/24, ku ai shfaqet si protagonist absolut. “Nuk jemi Kilian Saint Germain”, – shkruan lojtari dhe klubi tërheq videon.
Nuk ka paqe në shtëpinë e PSG-së. Pas vërshëllimave ndaj Lionel Mesit, që duket se do të largohet me përfundimin e kontratës, është Kilian Mbape që ka përfunfuar në qendër të diskutimeve. Ai ka kundërshtuar një video të publikuar nga klubi për abonimet e sezonit të ardhshëm. Mbape ka mbajtur qëndrim menjëherë në profilin e tij në Instagram, duke bërë që klubi ta hiqte videon.
Në videon që zgjat pak më shumë se një minutë, Mbape shfaqet duke folur në stadium për rëndësinë që ka mbështetja e publikut. Në asnjë moment nuk shfaqen as Mesi dhe as Nejmar, ndërkohë që shfaqen vetëm në pak sekonda Donaruma, Nuno Mendes dhe Zaire-Emeri.
Kjo zgjedhje nuk i ka pëlqyer sulmuesit. “Sapo kam parë videon e fushatës së abonimeve të klubit, – shkruan Mbape. – Në asnjë moment nuk jam informuar për përmbajtjen e intervistës. Dukej një bisedë e zakonshme në një ditë marketing të klubit. Nuk jam dakord me këtë video, prandaj luftoj për të drejtat e imazhit individuale. PSG është klub i madh, një familje e madhe, por nuk është Kilian Saint-Germain”.
Kjo situatë rrezikon t’i komplikojë më shumë raportet mes klubit dhe yllit të skuadrës, pas telenovelës së vitit të kaluar për rinovimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
