Nga Gazeta ‘SI’ – Numri i kontribuuesve në skemën e pensioneve është përmirësuar gjatë gjysmës së parë të vitit 2023, duke arritur në 789 mijë anëtarë. Në 6 muaj u shtuan 36.802 kontribuues të rinj, ndikuar më së shumti nga futja e fermerëve.
Privati mban më shumë se gjysmën e kësaj skeme, 64%, sipas shifrave të Institutit të Sigurimeve Shoqërore.
Lidhur me rritjen e kontribuuesve, ministria e Financave raporton një ulje të deficitit të skemës, në 23% nga 31% që ishte një vit më parë. Pra, është ulur pjesa e mbuluar nga buxheti i shtetit dhe është rritur mbulimi nga të ardhurat.
Efekt në këtë rritje duket të ketë dhe rritja e pagës minimale, nga 34 në 40 mijë lekë.
Të dhënat nga MFE tregojnë se të ardhurat e mbledhura nga kontributet për sigurimet shoqërore dhe shëndetësore (të administruara nga DPT), u realizuan në masën 79.7 miliardë lekë, 11.7 miliardë lekë ose 17.2% më shumë se 7 mujori 2022, si dhe realizim 110.5 % të planit për 7 mujorin 2023.
Mbulimi i skemës së pensionve qe për pak kohë një ndër shqetësimet kryesore të qeverisë, lidhur me rritjen e popullsisë se moshuar dhe pakësimin/largimin e të rinjve si kontribuues në tregun e punës. Prej disa kohës, skema po mbahej kryesisht nga subvencioni i shtetit. Nga kjo krizë doli dhe nisma për të zhvilluar më tej pensionet private.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
