Nga Gazeta ‘SI’ – Rivlerësimi i pasurive të paluajtshme nuk do të ndodhë brenda këtij viti.
Sipas ministrit të Financave, Petrit Malaj Rivlerësimi do të zgjasë edhe në 2025-n, pasi ende po vlerësohen çmimet referencë.
“Rivlerësimi i pasurive te paluajtshme do të bëhet paralelisht me caktimin e çmimeve të referencës për gjithë territorin e Shqipërisë, në mënyrë që të përfitojnë të gjithë. Është një proces që do të zgjasë përgjatë vitit të ardhshëm kur të bëhen referencat e reja”, u shpreh ministri Malaj në Komisionin e Veprimtarisë i cili theksoi se Rivlerësimi dhe çmimet e referencës duhet të ecin paralelisht.
Ideja për Rivlerësimin 3% u rikthye gjatë pranverës së këtij viti nga deputetja Blerina Gjylameti dhe gjeti mbështetjen e socialistëve.
Kryeministri Edi Rama pak kohë më vonë lajmëroi se ky do të jetë Rivlerësimi i fundit dhe do të jetë 5 e jo 3%.
“Ne e kemi bërë dy herë këtë proces. Në thelb është një amnisti. Ka kosto të rëndësishme për buxhetin e shtetit. Kur bëhet rivlerësimi atëherë shmanget tatimi 15% për shitjet në vijim. Duke qenë se e para u bë se nuk ishin referencat e reja, sot me referenca të reja, mund t’ju japim të drejtë qytetarëve të kenë një shans të fundit. E rëndësishme është të konkludojë referencat edhe për qytetet e tjera dhe bregdetin. Brenda 45 ditëve e konkludojmë”, tha Rama në korrik, por ende nuk ka një të re nga çmimet e referencës.
Nga ana tjetër, ekspertët e tregut imobiliar kanë dëshmuar një bllokim të këtij tregu, pasi pronarët janë në pritje të Rivlerësimit për të shitur pronën e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
