Në botën e futbollin po fryn një erë e re dhe ajo ka ngjyra femërore gjithmonë e më shumë. Pas suksesit të madh që pati kampionati Botëror i femrave këtë verë në Francë, e fituar nga SHBA, është UEFA ajo që po përgatitet për të bërë një hap të madh.
Për herë të parë në historinë e futbollit europian një finale e madhe do të arbitrohet nga një femër. Do të jetë pikërisht, Stéphanie Frappart e cila do të drejtojë finalen e Superkupës së Europës, e programuar për tu zhvilluar në 14 gusht mes Liverpulit dhe Çelsit.
Më herët femrat kanë arbitruar ndeshje të nivelit të lartë në futbollin e meshkujve, madje edhe si kryesore, por kaq lart asnjëherë nuk kishte shkuar. Francezja Stéphanie Frappart hyn kështu në histori dhe njëkohësisht thyen një tabu të futbollit europian, pasi më herët një gjë të tillë e kishte bërë në Francë, duke marrë përsipër gjykimin e ndeshjeve të rëndësishme në Ligue 1.
Ndër cilësitë kryesore që vlerësohen më shumë te Frappart është përgatitja e saj e lartë fizike, por edhe karakteri i fortë në administrimin e momenteve delikate gjatë një ndeshje. Më herët në futbollin e femrave, ajo ka drejtuar ndeshje në të gjitha nivelet, duke i hapur vetes mundësinë për të kaluar në futbollin që ka vlerë, në atë të meshkujve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
