Politike

“Rikthimi” i Pjetër Arbnorit… Bën bashkë politikën

Nisjes së seancës së kësaj të enjte në Parlament i parapriu një ceremoni e vendosjes së bustit të Pjetër Arbnorit në oborrin e Kuvendit. Ceremonia ishte konceptuar e shkurtër dhe e thjeshtë, ashtu siç ishte edhe vetë kryetari i parë i parlamentit, pasi Partia Demokratike fitoi zgjedhjet e 22 marsit 1992.

Aty u bënë bashkë “kundërshtarë” të përbetuar politikë në sallën e seancave, që nga Sali Berisha e deri tek, Lulzim Basha e Jozefina Topalli, Gramoz Ruçi dhe kryetari i Bashkisë së Tiranës, Erion Veliaj. I pranishëm ishte gjithashtu edhe Presidenti i vendit, Ilir Meta.

Busti u zbulua nga ish-Kryeministri Sali Berisha, ndërsa nga një fjalim të shkurtër mbajtën kreu i Kuvendit, Gramoz Ruçi dhe Besnik Mustafaj, si një prej miqëve më të ngushtë të Pjetër Arbnorit.

“Pjetër Arbnori ishte një personalitet politik i vendosur dhe i respektuar. Jeta vuajtjen ia derdhi lumë, kurse lumturinë ia dha me vonesë dhe ia mori shpejtë”, tha ndër të tjera Ruçi.

Gramoz Ruçi dhe Besnik Mustafaj në ceremoninë e përurimit të bustit

Besnik Mustafaj riktheu në kujtesë kulturën politike të pashembullt të Pjetër Arbnorit, edhe pse ishin vite të vështira.

“Ai ishte një burrë i pjekur dhe i ditur, i aftë ta zgjedhë fjalën e duhur. Ishte pajtues, por jo në dëm të së vërtetës. Nëse do ulej në këtë sallë sot, do të ishte kundërshtar politik i Gramoz Ruçit. Por ai prapë për këtë bust do ta falënderonte atë”, u shpreh Mustafaj.

Pjetër Arbnori lindi në Durrës në vitin 1935. Babai i tij refuzoi komunizmin dhe mbeti i vrarë gjatë përplasjeve me partizanët. Ai përfundoi gjimnazin me rezultate të shkëlqyera, por biografia “me njollë” e penalizoi. Arriti që të përfundojë disa kurse në filozodi nën një identitet të rremë dhe më pas nisi punën si mësues në Kavajë.

Këtu nisi organizimin e një lëvizjeje kundër regjimit komunist. U zbulua nga “Sigurimi” dhe u arrestua së bashku me gjashtë persona të tjerë. Në procesin gjyqësor që zgjati 2 vjet mes torturave të shumta, ai u dënua fillimisht me vdekje, por më pas dënimi u reduktua në 25 vite burg, pasi Sigurimi i asaj kohe shpresonte që Arbnori do t’i drejtonte në arrestimin e personave të tjerë të përfshirë në lëvizjet kundër regjimit.

Në vitin 1985 i përfundonte dënimi. Gjatë periudhës në qeli kishte shkruar disa novela e romane, mes të cilëve edhe “Shtëpia e lënë përgjysmë”. Pikërisht për këtë vepër atij iu shtuan edhe 10 vite të tjera. U lirua në vitin 1989, kur nisi në të gjithë Lindjen era e ndryshimeve. Pesë muaj pas lirimit ishte pjesëmarrës në protestën antikomuniste në Shkodër dhe rrëzimin e bustit të Stalinit atje.

Me ardhjen e demokracisë u angazhua në politikë me Partinë Demokratike. U zgjodh deputet dhe më pas kryetari i parë i Kuvendit pas ardhjes së kësaj force në pushtet. Pas trazirave të 1997 vijoi të mbetej aktiv në politikë. U vendos në qendër të vëmendjes pas vendimit të mazhorancës socialiste të asaj kohe të udhëhequr nga Fatos Nano për ligjin e RTSH. Arbnori dhe opozita kundërshtonin ligjin duke deklaruar se ai censuronte aktivitetet dhe fjalën e saj.

Pjetër Arbnori u fut në një grevë urie, që zgjati disa ditë. Në fund, PS u tërhoq dhe pranoi një amendim të ligjit, që u njoh më vonë si “Amendamenti Arbnori”.

Pjetër Arbnori u nda nga jeta më 8 korrik të vitit 2006, një vit pasi PD ishte rikthyer sërish në pushtet.


Copyright © Gazeta “Si”



Më Shumë