Europa League rikthehet pas disa ditësh në “stand -by”. Këtë të enjte do të zhvillohen 16 sfida për të hedhur hapin e parë drejt përcaktimit të atyre që do të vazhdojnë më tej aventurën në Europa League. Sfida interesante, të paparashikueshme, në ekuilibër, pavarësisht se janë shmangur përplasjet e emrave të mëdhenj.
Në fakt, sa herë dëgjojnë emrin e serbëve tifozëve të Milan i zgjohen kujtime të bukura. Kur kanë eliminuar formacionin e Zvezdas kuqezinjtë kanë fituar dy Champions e kushedi nëse profecia nuk përsëritet edhe në Europa League. Kuqezinjtë vijnë në kampionat nga një humbje e papritur me Spezia e përplasja e me serbët vjen në momentin më pak të përshtatshëm, por duhet përballur, duke u inspiruar ndoshta në librin e rekordeve. Milan është i pathyer në katër precedentët kundër Crvena Zvezda. Përballja e fundit është ajo e sezonit 2006-07, në paraeleminatore, me Carletto Ancelotti në pankinë.
Ndeshja e të enjtes do të jetë një derbi për Dejan Stankovic, që prej një viti në drejtim të Zvezdës. Në garat europiane kundër ekipeve italiane, klubi serb ka fituar vetëm 3 ndeshje në 25, e fundit kundër Romës në dhjetor 2005 (3-1). Ish-lojtari i Lazio (1998-2004) dhe Inter (2004-13) do të gjejë përballë – si kundërshtar – Zlatan Ibrahimovic, me të cilin fitoi tre tituj kampionë gjatë periudhës tek Inter. I pamundur në Maracanà të Beogradit prej 13 ndeshjesh në kualifikuese në katër sezonet e fundit (9 fitore e 4 barazime), Zvezda ka një bilanc prej 3 fitoresh 3 barazimesh e vetëm një humbje në shtëpi në Europa League, nga faza e grupeve e më tej: e vetmja skuadër që arriti ta mundte ishte Arsenal.
Sakaq, në këtë kompeticion nuk mungojnë edhe ekipet e shqiptarëve si Roma apo Napoli. Te verdhekuqtë që përballen me Bragën në transfertë duket e vështirë që Kumbulla të jetë pjesë e ndeshjes pasi ka pasur shqetësime fizike, ndërsa te Napoli mungon Hysaj për dëmtim, por do të jetë i gatshëm Rrahmani. Topçinjtë ndërkohë duhet të bëjnë llogaritë me Benfikën në Lisbonë, në një ndeshje spektakolare. Përplasje interesante edhe ndeshjet e tjera ku spikat ajo mes Sociedad e Manchester United.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
