Gazeta Si – Seria A duket në prag të një revolucioni sa u takon drejtorëve sportivë. Përveç merkatos së futbollistëve, në verë pritet të ketë lëvizje të rëndësishme edhe mes këtyre drejtuesve në disa klube.
Emrat më të lakuar për momentin mbeten Xhovani Sartori i Atalantës, Federiko Xhuntoli i Napolit dhe Igli Tare i Lacios. Për Taren në fakt nuk është hera e parë që diskutohet ndarja me Lacion, pasi për drejtuesin shqiptar më parë ka pasur oferta nga klube të tjera të mëdha, si Milani dhe Interi. Sipas “Gazzetta dello Sport”, Tare duhet të qartësojë raportin me trajnerin Mauricio Sarri dhe për momentin emri i tij mbetet në ‘merkato’.
Interesimi i fundit për ish-kapitenin e Kombëtares vjen nga Gjermania, ku Tare ka luajtur më parë. Eintrahti i Frankfurit e sheh Taren si njeriun e duhur për t’i besuar të ardhmen e skuadrës.
Për Sartorin e Atalantës, një nga drejtorët sportivë më të suksesshëm, ka një interesim nga Juventusi dhe Bolonja, ndërsa Xhuntoli duket se do të largohet nga Napoli, edhe pse ka ende kontratë me këtë klub.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
