Trajneri i Kombëtares, Edi Reja, ka shpallur listën e lojtarëve të grumbulluar për tri ndeshjet e radhës, miqësoren vëllazërore me Kosovën më 11 nëntyor dhe ato dy zyrtare me Kazakistanin më 15 nëntor dhe Bjellorusinë më 18 nëntor, ku vendoset fati i grupit në Ligën e Kombeve.
Bie në sy menjëherë rikthimi i tre lojtarëve me shumë përvojë në radhët e kuqezinjve, mesfushorit Ledian Memushaj dhe dy sulmuesve Sokol Cikalleshi dhe Bekim Balaj, të cilët kanë munguar në ndeshjet e fundit. Sigurisht, Kombëtarja ka nevojë për përvojë në dy ndeshje vendimtare për kreun e grupit dhe trajneri Reja e di mirë këtë gjë. Atij i duhen pikët maksimale. Në fakt, ritkhimi i Memushajt është i diktuar edhe nga mungesa e Keidi Bares, një lojtar kyç për formacionin kuqezi. Memushaj mund ta ndihmojë shumë skuadrën, pasi është një lojtar që mban topin dhe ekzekuton goditjet standarde.
Rikthime në Kombëtare janë edhe ato të mbrojtësit Ardjan Ismajli dhe sulmuesit Myrto Uzuni, të cilët kanë pasur probleme shëndetësore që tashmë i kanë kaluar. Konfirmohen në listën e trajnerit Reja lojtarët e rinj të grumbulluar në ndeshjet e fundit, si Sherif Kallaku, Enis Çokaj, Ramen Çepele, Armando Broja dhe Albi Doka.
Mungesë tjetër e rëndësishme, përveç Bares, është ajo e portierit Tomas Strakosha, i cili, bashkë me dy shokë skuadre te Lacio, janë në qendër të një debati në Itali sa i takon tamponëve të Covid-19, ku përgjigjet kanë qenë të ndryshme. Reja ka grumbulluar portierin tjetër të Lacios, Marko Alia, përveç Berishës dhe Hoxhës. Mungon këtë herë në listë edhe mbrojtësi i PAOK-ut, Enea Mihaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
