.png)
Nga Gazeta ‘Si’- Janë intensifikuar lëkundjet sizmike në ishullin e Santorinit në Greqi, ku sipas mediave greke, në një orë regjistrohen të paktën 10 lëkundje.
Midis të premtes dhe të dielës, më shumë se 200 tërmete u zbuluan duke përfshirë një tërmet me magnitudë 4.6, më i fuqishmi deri më tani, sipas autoriteteve.
Shumë banorë të zonës janë larguar nga ishulli gjatë ditës së djeshme dhe gjatë natës, ndërsa të tjerë janë strehuar në zona të posaçme të ngritura nga autoritetet në raste emergjence.
Sipas Protothema, shqetësimi për tërmetet në Santorini është përhapur edhe në Turqi, ku sizmologët u kërkuan banorëve të zonave bregdetare si Bodrum, Mugla dhe Aydin të jenë në gatishmëri për një cunami.
Pas takimit të kryeministrit Mitsotakis me Ministrin e Mbrojtjes Civile, shefin e Shtabit të Përgjithshëm të Mbrojtjes Kombëtare Greke, drejtorin e kërkimit në Institutin Gjeodinamik dhe profesori i Fatkeqësive Natyrore, u tha se situata është shqetësuese, por brenda kufijve.
Po ashtu, mediat shkruajnë se ekziston frika edhe për një tërmet 6 ose më shumë të shkallës Rihter.
“Janë duke u shqyrtuar të gjithë elementët e aktivitetit sizmik. Masat që janë marrë deri më tani janë parandaluese. Në çdo rast komisioni për përballimin e rrezikut sizmik do të jetë vazhdimisht prezent dhe do të takohet me të gjithë. I bëj thirrje bashkëqytetarëve që të dëgjojnë masat e ekspertëve”, tha ministri i mbrojtjes pas takimit.
Shkollat do të mbyllen gjithashtu në ishujt e afërt të Egjeut, Anafi, Ios dhe Amorgos, thanë autoritetet të dielën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
