.png)
Në hartimin e reformës territoriale, Komisioni i posaçëm parlamentar do të bazohet te shembujt që mbërrijnë nga rajoni.
Mbledhja proceduriale e mbajtur këtë të mërkurë përcaktoi dërgimin e ekspertëve, ose të vetë një përfaqësie të komisionit në Maqedoninë e Veriut, Kosovë dhe Malin e Zi për të marrë përvojën e këtyre vendeve në ndarjen e re territoriale.
Mbledhja formale u shoqërua nga dakordësia unanime mes mazhorancës dhe opozitës për kalendarin e punimeve, që do të fillojë nga java e ardhshme me dëgjesat dhe propozimet e 12 organizatave dhe shoqatave të shoqërisë civile.
Dakordësi u gjet edhe me listën tjetër të dëgjesave, që ka të bëjë me institucionet shtetërore, kryebashkiakët dhe përfaqësi të tjera të pushtetit qendror dhe vendor.
Ndasitë në lidhje me ndarjen e re mund të shpërfaqen kur Komisioni të hyjë në përcaktimin e numrit të bashkive. PD kërkon shtimin e tyre në rreth 100 bashki, ndërsa PS prej kohësh këmbëngul te reduktimi i mëtejshëm, ku ka paraqitur dy variante, njëri me 41 bashki dhe tjetri me 36 bashki.
Çështja tjetër, por që kërkon dakordësinë e të dyja palëve lidhet me qarqet. Sipas PS-së, qarqet e kanë humbur funksionin e tyre dhe propozon ndarjen e vendit në tre, ose katër rajone të mëdha. Por, për shkrirjen e 12 qarqeve kërkohet ndërhyrja në Kushtetutë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
