Gazeta Si – Antonio Rudiger është gati të firmosë për Realin e Madridit. Madje, e përditshmja spanjolle “Marca” e bën fakt të kryer transferimin e mbrojtësit gjerman.
Lojtari ka vendosur të mos rinovojë me Çelsin, siç pohoi publikisht pas ndeshjes me Uest Hemin edhe trajneri Tomas Tuhel. Kërkesat ekonomike të Rudiger janë të larta, 12 milionë euro, një shifër që Reali mund t’ia garantojë, ndaj dhe bisedimet kanë avancuar. Për mbrojtësin ishte i interesuar edhe Juventusi.
Rudiger është kandidati numër 1 për forcimin e mbrojtjes së Realit. Sipas “Marca”-s, përveç mbrojtësit gjerman, në Madrid do të transferohen edhe Kilian Mbape nga PSG-ja dhe Fran Garsia i Rajo Valekanos, i cili aktualisht është në bashkëpronësi të dy klubeve.
Për momentin, puna është përqendruar te 29-vjeçari i Çelsit dhe marrëveshja mund të mbyllet brenda javës. Rudiger do të kalojë te Reali me parametra zero dhe do të firmosë një kontratë 4-vjeçare me ekipin e Karlo Ançelotit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
