Gazeta Si – Pavarësisht driblimeve të shpeshta të Karlo Ançelotit, është i sigurt tashmë kalimi i tij në stolin e Brazilit, duke nisur nga sezoni i ardhshëm. Një tjetër konfirmim, edhe pse indirekt, vjen nga Spanja, ku RadioMarca siguron se Real Madrid e ka vendosur kush do të jetë trajneri i ri: Ksabi Alonso.
Për të do të ishte një rikthim në Madrid, ku ka luajtur nga 2009-a deri në 2014-ën (sezonin e fundit me Ançelotin trajner). Ish-mesfushori numëron 236 ndeshje dhe ka fituar 1 titull kampion, 2 Kupa Spanje, 1 Superkupë Spanje, 1 Champions dhe 1 Superkupë UEFA.
Spanjolli e vazhdoi karrierën si trajner së pari te Real Sociedad B dhe pastaj te Bajer Leverkusen, ku vazhdon të mahnisë. E mori drejtimin e ekipit gjerman në tetor të 2022-shit, e mbylli sezonin e kaluar në vend të 6-të dhe këtë sezon kryeson.
Sipas RadioMarca, Ksabi Alonso, 42 vjeç në nëntor, duket se ka kaluar përfundimisht hierarkitë e brendshme, konkretisht Raulin, trajnerin aktual të Real Madrid Kastija, që pritej të promovohej në skuadrën e parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
