Pas skandalit të mjekëve në QSUT, Shërbimi Onkologjik ka thyer heshtjen. Me anë të një prenoncimi për median, mjekë të këtij spitali pranojnë se ka mungesë të ilaçeve në shërbimin e sëmundjeve të rënda, ndërsa sqarojnë akuzat për përgjysmimin e dozave të mjekimit.
Kimioterapeuti Sotiraq Senjo thotë se janë mjekët ata që përcaktojnë dozën e kimioterapisë në varësi të gjendjes dhe moshës së pacientit.
“Asnjë shtet nuk arrin t’i plotësojë të gjitha nevojat për medikamente pasi çdo 3 muaj mund të dalin medikamente të reja dhe okologjia është gjithmonë një thes i shpuar. Pacienti duhet të menaxhohet në kushtet që jemi”, tha Senjo, duke shtuar se asnjë mjek nuk ka lidhje të drejtpërdrejtë me ilaçet, pasi mjekët vetëm shkruajnë recetën.
Ndërsa shërbimi i Radiologjisë në Onkologjik ka sqaruar dyshimet e ngritura nga një grup mjekësh brenda këtij spitali, për nivele të larta të rrezatimeve që vijon të lëshojë sipas tyre aparatura e Brakiterapisë.
Fizikanët pranojnë se norma e rrezatimeve u tejkalua disafish vetëm kur u bë testimi për ta vënë në punë. Pasi ekspertët e huaj konstatuan se ambienti në Onokologjik nuk plotësonte kushtet teknike për radioaktivitetin, u vendos mbyllja e aparaturës si dhe u bë kapsulimi i burimit radioaktiv, me të cilin punon pajisja.
Rozana Buçi, fizikante pranë QSUT tha për median se burimi radioaktiv është i rrezikshëm kur del nga kapsulimi
Pas publikimit të dosjes në media, mjekët nuk fshehin klimën e acaruar mes tyre dhe pacientëve.
Mjeku Senjo tha për median se marrëdhënia mjek-pacient është agravuar dhe kjo do të ketë pasoja afatgjatë.
“Pacientët janë të shqetësuar dhe të acaruar”, tha mjeku.
Pas ngjarjes në QSUT, Ministria e Shëndetësisë ka pezulluar nga detyra mjekët Alketa Pere, Edmond Gashi, koordinatorin Emiljano Lela dhe zëvendësdrejtoreshën e QSUT, Brikena Qirizai, përgjegjëse për onkologjikun. Ndërsa Brakiterapia apo kobalti vijon të jetë e mbyllur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.