Rastet e fruthit në të gjithë Europën po rriten, ku numri i rasteve të regjistruar deri tani për këtë vit do të tejkalojë numrin total të rasteve të raportuara gjatë vitit 2023, paralajmëruan OBSH dhe UNICEF.
Sipas të dhënave më të fundit të disponueshme, 56,634 raste të fruthit dhe katër vdekje u raportuan zyrtarisht në 45 nga 53 vende në Rajonin Evropian të OBSH-së gjatë tre muajve të parë të vitit 2024. Gjatë gjithë vitit 2023, 61,070 raste dhe 13 vdekje u raportuan nga 41 vende.
Fruthi ka një efekt shkatërrues në shëndetin e fëmijëve, me fëmijët e vegjël më të rrezikuar nga komplikime të rënda. Shkalla e lartë e shtrimit në spital dhe dobësimi i sistemit imunitar të fëmijëve i bëjnë fëmijët më të prekshëm ndaj sëmundjeve të tjera infektive. Më shumë se gjysma e atyre që u prekën nga fruthi në vitin 2023 u shtruan në spital.
“Edhe një rast i fruthit duhet të jetë një thirrje urgjente për veprim”, vuri në dukje Dr Hans Henri P. Kluge, Drejtor Rajonal i OBSH-së për Evropën.
“Askush nuk duhet të vuajë pasojat e kësaj sëmundjeje shkatërruese, por lehtësisht të parandalueshme. U bëj thirrje të gjitha vendeve që të ndërmarrin veprime të menjëhershme, të vaksinojnë fëmijët dhe në këtë mënyrë të parandalojnë që virusi të përhapet në çdo komunitet.”
Pothuajse gjysma e rasteve të raportuara në vitin 2023 ndodhën në mesin e fëmijëve nën moshën pesë vjeç, duke reflektuar një numër të fëmijëve që humbën vaksinimet rutinë kundër fruthit dhe sëmundjeve të tjera të parandalueshme gjatë pandemisë COVID-19, shoqëruar me rikuperim të ngadaltë në mbulimin me vaksinim në 2021 dhe 2022.
“Rritja e rasteve të fruthit është një shenjë e qartë e një prishjeje mekanizmi në mbulimin e imunizimit. Ndërsa rastet e fruthit vazhdojnë të rriten, ne kemi nevojë për veprim urgjent të qeverive për të forcuar sistemet shëndetësore dhe për të zbatuar masa efektive të shëndetit publik për të siguruar mbrojtje për të gjithë fëmijët nga kjo sëmundje e rrezikshme por e parandalueshme,” thotë Regina De Dominicis, Drejtoreshë Rajonale e UNICEF-iy.
Në mesin e fëmijëve nën moshën pesë vjeç që u prekën nga fruthi në vitin 2023, më shumë se tre të katërtat nuk kishin marrë asnjë dozë vaksinimi kundër fruthit. Rreth 99 për qind e këtyre fëmijëve nuk morën dy doza të vaksinës kundër fruthit, e cila ofron mbrojtjen e nevojshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
