.png)
Qeveria shkeli rregullin fiskal të mosrritjes së borxhit publik vitin e kaluar duke u justifikuar me nevojën për të financuar sistemin shëndetësor për të përballuar pandeminë dhe pasojat e saj.
Në realitet, shpenzimet për shëndetësinë u rritën në 8-mujorin e parë të vitit të kaluar, por sipas një raporti monitorimi të fondacionit britanik “Westminster”, fondet totale për këtë sektor u ulën.
“Buxheti i shtetit vijon të mos i japë vëmendjen e duhur shpenzimeve në shëndetësi. Pavarësisht se qeveria ka deklaruar se rriti borxhin publik në rreth 80% të PBB-së në 2021 për t’i dhënë mbështetje sektorit të shëndetësisë, në realitet i ka shkurtuar fondet për shëndetësinë. Në ndryshimet e fundit buxhetore që u bënë me akt normativ në 3 dhjetor 2021, tregojnë se fondet totale për Ministrinë e Shëndetësinë ishin 70,1 miliardë lekë, 0.6 për qind më të ulta se në buxhetin fillestar”, thuhet në raportin e monitorimit.
Raporti thotë se pasojat direkte të pandemisë në shëndetin e personave që e kanë kaluar atë, si dhe vonesat në trajtimin e diagnostikimin e sëmundjeve të tjera për shkak të karantinës, kanë ndikuar në rritjen e barrës së sëmundshmërisë në vend për 9 mujorin 2021.
“Sistemi shëndetësor do të vuajë pasojat e “COVID të zgjatur” çka do të ndikojë në rritjen e barrës së të sëmurëve kronike në vijim”, thekson raporti.
Shqipëria mbetet ndër vendet e fundit në Europë sa i përket vaksinimit përgjatë gjithë vitit 2021, në raport me popullatën, pavarësisht angazhimit të qeverisë me sigurimin e 2.6 milionë dozave të vaksinave dhe vendimit për dhënien e dozës së tretë.
Raporti monitorues thotë se ka doza të larta skepticizmi mes qytetarëve dhe njëri prej faktorëve që mund të ketë ndikuar në këtë skepticizëm rendit efikasitetin e ulët të vaksinave kineze, me të cilat janë vaksinuar një pjesë e madhe e popullsisë.
Nga monitorimi theksohet gjithashtu se sektori i shëndetit në Shqipëri vuan nga mungesa e të dhënave. Mungojnë raportimet, transparenca dhe digjitalizimi i tyre dhe mungesa e tyre bëhet shkak për politika të dobëta që nuk i çon investimet në infrastrukturë dhe burimet njerëzore aty ku duhet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
