.png)
Gazeta Si – Pas rreth 5 vitesh nga krijimi i saj, për herë të parë Prokuroria e Posaçme ka treguar si problematikë presionin e jashtëm dhe sfidat që kjo strukturë ka nga krimi i organizuar, politika dhe nga media, duke ndikuar në pavarësinë e institucionit.
Në raportin vjetor prej 109 faqesh për vitin 2024 që SPAK dorëzoi në Kuvend, pranon se ndërhyrjet nga faktorët e jashtëm kanë rrezikuar të cenojnë po ashtu edhe integritetin e prokurorëve të posaëm, si dhe çështjet hetimore të ndjekura prej tyre.
SPAK kërkon një reagim më të koordinuar nga institucionet përgjegjëse për të garantuar mbrojtjen e integritetit të prokurorëve dhe proceseve hetimore.
Një tjetër shqetësim i ngritur është numri i ulët i referimeve për korrupsion dhe krim të organizuar nga institucionet publike dhe Policia e Shtetit.
“Ndërhyrjet e jashtme rrezikojnë gjithashtu, integritetin e prokurorëve dhe të procesit hetimor. Për të garantuar pavarësinë e SPAK-ut si dhe mbështetje për prokurorët në çështje të ndjeshme, nevojitet një reagim më i koordinuar dhe në kohë i të gjitha institucioneve të cilat kanë përgjegjësinë e mbrojtjes së integritetit të SPAK”, thuhet në raportin e Prokurorisë së Posaçme.
Raporti evidenton shifrat në luftën kundër krimit të organizuar, korrupsionit, arrestimit të zyrtarëve të lartë, e deri te sekuestrimi e konfiskimi i pasurive ndaj grupeve kriminale.
Prokuroria e Posaçme, thotë se rezultojnë të jenë nën hetim 33-ish zyrtarë të lartë, nga të cilët 19 zyrtarë janë dërguar në gjykatë me kërkesë për gjykim.
Nga numri total i ish-zyrtarëve të lartë nën hetim, 19 prej tyre janë dërguar në gjykatë, që përfaqëson 52,9% të rasteve.
Në raportin e SPAK për vitin 2024, thuhet se vlera e pasurive të sekuestruara ka shënuar një rritje të ndjeshme në vitin 2024, prej rreth 47%, konkretisht nga 1.9 miliardë lekë në vitin 2023, në vlerën rreth 2.8 miliardë lekë në vitin 2024.
Konkretisht vlera e pasurive të konfiskuara gjatë vitit 2024, është në vlerën rreth 938 milionë lekë nga 440 milionë lekë që ishte në vitin 2023 dhe 27 milionë euro nga rreth 18 milionë euro që ishte në vitin 2023.
“Sa i përket vlerave të pasurive të konfiskuara dhe sekuestruara nga Prokuroria e Posaçme gjatë viti 2024, rezulton se rreth 30 milionë euro, ose rreth 45,8% të vlerës totale të pasurive të konfiskuara dhe sekuestruara përgjatë këtij viti, e zënë pasuritë që ju përkasin zyrtarëve të lartë.”- thuhet në raportin e SPAK.
Në total, vlera e aseteve të sekuestruara dhe konfiskuara, përllogaritet në vlerën afërsisht prej 65,5 milionë euro.
Raporti i SPAK, vëren se ka ruajtur të njëjtin trend pozitiv edhe në qasjen pro aktive të hetimeve.
Gjatë vitit 2024 janë regjistruar 65 hetime të nisura kryesisht, edhe pse krahasuar me vitin 2023, vihet re një rënie në masën rreth 7,1% e interceptimit të pajisjeve fundore.
Sipas SPAK, lufta kundër krimit të organizuar edhe për këtë vit, krahasuar me vitin paraardhës, ka shënuar arritje të rëndësishme me një rritje prej rreth 18,8% të regjistrimeve të këtyre procedimeve penale.
Po kështu, është rritur edhe numri i personave të cilët janë nën hetim për këto procedime me rreth 21,6%, krahasuar me vitin 2023.
Nga ana tjetër, ka një rënie me rreth 7,3% të çështjeve të dërguara për gjykim për shkak të volumit dhe kompleksitetit të tyre.
Për sa i përket luftës kundër korrupsionit, Prokuroria e Posaçme ka ndjekur një qasje aktive duke hetuar një numër të konsiderueshëm zyrtarësh të lartë.
Bashkëpunimi nga institucionet publike në lidhje me referimet e ardhura prej tyre ka nevojë ende të përmirësohet.
Kështu numri i procedimeve të filluara nga referimet e përcjella nga institucionet publike mbetet i ulët, duke zënë vetëm 15,1% të totalit të referimeve të dërguara pranë SPAK nga të gjitha subjektet publike dhe private.
Është për t’u theksuar se, referimet e ardhura nga Policia e Shtetit, krahasuar me vitin 2023, kanë shënuar gjithashtu një rënie shqetësuese me 53,8%.”
Raporti i SPAK, thekson se grupet kriminale shqiptare kanë rol të madh në tregjet ndërkombëtare, në trafikun e drogës dhe trafik të qenieve njerëzore. Gjithashtu, Prokuroria e Posaçme vëren se grupet kriminale kanë rol edhe në krimin kompjuterik.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
