.png)
Nga Gazeta ‘Si’- Kryeministri shqiptar, Edi Rama, në një intervistë për Reuters, ka folur për marrëveshjen me Italinë për të strehuar refugjatët në qendrat e pritjes në Shëngjin e Gjadër.
Ai përjashtoi çdo mundësi që të ketë një marrëveshje të ngjashme me atë të Italisë për emigrantët me shtete të tjera në Bashkimin Evropian.
I pyetur nëse një marrëveshje e tillë ishte e mundur edhe me Gjermaninë, Rama tha se aktualisht nuk ka kapacitet të mjaftueshëm.
“Gjermania duhet të gjejë një partner tjetër, sepse Shqipëria ka krijuar një marrëveshje me Italinë dhe Shqipëria nuk mund ta bëjë këtë me të gjithë. Dhe nëse Gjermania gjen një partner tjetër në rajon, do të ishte mirë të shihej nëse funksionon në të njëjtën mënyrë”, deklaroi ai.
Rama foli edhe për Samitin e Procesit të Berlinit ku tha se një Marrëveshje e zgjeruar e Tregtisë së Lirë të Evropës Qendrore (CEFTA) për rajonin e Ballkanit Perëndimor ishte e arritshme pasi Shqipëria kërkon të anëtarësohet në Bashkimin Evropian deri në 2030.
“Është e rëndësishme të… rregullojmë mekanizmin e CEFTA-s”, tha ai.
Kur mbeten edhe pak muaj nga zgjedhjet e përgjithshme, kreu i qeverisë shqiptare shfaqi hapur objektivin e tij për të kandiduar për një mandat të katërt si kryeministër.
“Plani është të kandidojmë. Unë besoj se duhet të kandidoj sepse ka punë për të përfunduar. Në këto tre mandate, ne kemi bërë gjëra të mahnitshme. Shqipëria ishte vetëm një lajm i keq kur bëhej fjalë për lajme, por tani kemi kapërcyer tavanin e 10 milionë turistëve në një vend ku turizmi ishte një ide e mirë, por nuk ishte bërë ende realitet. Ka ende shumë gjëra për tu bërë, siç është lufta kundër korrupsionit që duhet të jetë një luftë e pakthyeshme”, deklaroi ai.
Një nga arsyet që sipas tij shqiptarët duhet t’i besojnë socialistëve një mandat tjetër është edhe integrimi i Shqipërisë në Bashkimin Europian brenda vitit 2030.
“Mundësia është tani më shumë se kurrë. Kështu që synimi ynë gjithsesi është që ta bëjmë Shqipërinë një vend anëtar si një vend për të bërë të gjitha detyrat e shtëpisë, duke përfshirë të gjitha reformat e ndërtimit të institucioneve, të përmbushin të gjitha kriteret dhe standardet brenda vitit 2030”, tha ai për Reuters.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
