.png)
Nga Gazeta ‘Si’- Kryeministri Edi Rama në një takim me kryebashkiakët socialistë në Pallatin e Kongreseve vuri fokusin tek ngritja e emergjencave civile në nivel vendor.
Mbledhja u zhvillua me dyer të mbyllura ndërsa u diskutuan çështje me interes për pushtetin vendor dhe përmirësimin e shërbimit ndaj qytetarëve.
Mësohet se Rama ka vënë theksin te mbledhja dhe përpunimi i mbetjeve, sidomos në zonat turistike.
Në fokus është edhe Paketa e Maleve, puna për të cilën duhet të jetë e vrullshme nga ana e kryebashkiakëve, pasi kreu i qeverisë ka vënë një kusht për rikandidimin e tyre që lidhet pikërisht me këtë nismë.
Sipas Ramës, nëse duan që të rikandidojnë, duhet të sjellin në tryezë minimalisht 10 kontrata të firmosura për Paketën e Maleve.
Gjatë takimit u diskutua edhe menaxhimi i parkimeve në qytete dhe nevoja për përmirësimin e ndërtesave të vjetra të privatizuara, që kanë degraduar me kalimin e kohës.
U theksua gjithashtu rëndësia që shtëpitë dhe objektet me vlerë historike dhe kulturore në qytete të kthehen në muze për të ruajtur trashëgiminë kulturore.
Ndërkohë Rrok Dodaj, kryetari demokrat i bashkisë së Pukës tha se nuk u lejua të marrë pjesë në mbledhje.
Ai konfirmoi se ka pasur ftesë për të marrë pjesë në takim përmes emailit, por nuk është lejuar të futet në ambientet e Pallatit të Kongreseve për shkak se nuk kishte emrin në listë.
Në një sqarim të mëtejshëm, ai tha se është kontaktuar nga PS dhe i kanë shpjeguar se ftesa i është dërguar gabimisht nga sekretarja.
Ditët e fundit, Rama ka mbajtur disa takime me strukturat e Partisë Socialiste në kryeqytet, si një parapërgatitje për zgjedhjet e ardhshme vendore. Prioritet për mazhorancën në këtë mandat të katërt qeverisës mbetet edhe integrimi në Bashkimin Europian.
Më 21 mars, u mblodh për më shumë se 3 orë në Durrës Asambleja Kombëtare e Partisë Socialiste, duke çelur zyrtarisht fushatën për garën brenda partisë. Sekretari i Përgjithshëm i PS-së, Blendi Klosi, analizoi rezultatet zgjedhore të 2025-ës dhe vendosi afatet për të gjithë procesin e “riformatimit” të strukturave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje