Nga Gazeta ‘Si’- Kryeministri Edi Rama ka zhvilluar ditën e sotme konferencën e fundvitit me gazetarët. Në fjalën e tij kreu i qeverisë u ndal tek procesi i integrimit të vendit drejt Bashkimit Europian, ndërsa vlerësoi punën e administratës shtetërore.
Rama tha se çelja e negociatave ishte fakti më domethenës i vitit 2024.
“Po e nis me faktin sipas meje më domethënës të vitit që po lëmë pas çeljen e negociatave për anëtarësim me Bashkimin Europian dhe praktikisht të dy grup-kapitujve shumë të rëndësishëm duke nisur nga themeloret që janë gurpi i grupeve dhe pastaj edhe marrëdhëniet me jashtë.
Por është me rëndësi të theksoj këtu diçka që e keni dëgjuar edhe me parë që ky proces i jashtëzakonshëm për nga volumi i punës intensiteti dhe cilësia do të ishte i pamundur nëse një skuadër e madhe kombëtare e Shqipërisë e qindra e qindra punonjës të administratës sonë publike, negociatorë, drejtues grupesh, anëtarë grupesh nuk do të kishin bërë më parë punë e shkëlqyer me procesin screening ose e thënë ndryshe me diaganozën e gjithë sistemit të Republikës së Shqipërisë në të gjitha fushat”, tha Rama.
Kreu i qeverisë theksoi se ecuria e procesit screening ka pasur një vlerësim befasues nga Komisioni Europian të qeverisë, që ishin tipikisht përfaqësues të vendeve më skeptike të BE-së për performancën e skuadrës shqiptare.
Sipas Ramës këto vlerësime janë një shtysë, një motivim janë një fakt shumë domethënës për çfarë është bërë në gjithë këto vite dhe cila është vërtetë administrata e Republikës së Shqipërisë.
Një tjetër sukses për Shqipërinë sipas kryeministrit është dalja pas 29-vjetësh e Shqipërisë nga faza e monitorimit të plotë të Asamblesë së Këshillit të Europës.
Rama njoftoi gjithashtu se deri në 2027 Shqipëria do të përfitojë rreth 1 miliard euro.
“Së treti Shqipëria është bërë nxitësi dhe ia ka dalë të shtyjë dhe të bëjë të mundur duke u futur në bashkëpunim me vendet e tjera të rajonit, jo vetëm një dialog të pandodhur më parë mes KE, vendeve anëtare dhe vendeve kandidate nga ku doli si rezultat konkret plani i ri i rritjes së BE në mbështetje të Ballkanit Perëndimor. Ka qenë një proces jo i lehtë për të arritur që në procesin tradicional të integrimit të hyjë një element i ri, i cili ka hyrë në fjalor si anëtarësimi gradua.
Ne dhe vendet e rajonit kemi në dispozicion një instrument të ri financiar të planit të rritjes ku nga sot deri në 2027 do të thithim rreth 1 mld euro dhe kemi njëkohësisht dritën jeshile për t’u bashkuar me familjen europiane në disa segmente të Europës së bashkuar”.
Po kështu Rama deklaroi se: “Që nga 21 nëntori shqiptarët në të gjithë botën që bëjnë transferta parash nga zona e be drejt Shqipërisë nuk do të kenë asnjë komision extra, se Shqipëria është zyrtarisht anëtare e zyrave të pagesave europiane që kursen miliona euro nga xhepat e dërguesve nga jashtë, brenda perimetrit të BE”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
