Gazeta Si – Një vendim i bujshëm vjen nga Spanja dhe që ka të bëjë me çështjen e racizmit ndaj Vinicius në stadiumin e Valencias. Kartoni i kuq i dhënë për lojtarin brazilian është anuluar, sepse arbitri nuk ishte në kushtet më të mira për të marrë vendimin e duhur.
Valencia-Real e së dielës që shkoi u ndërpre për 10 minuta, kur ndaj Vinicius pati sulme raciste nga tribunat. Lojtari brazilian kërkoi përjashtimin e një tifozi të Valencias, por më pas u ndëshkua me karton të kuq, pasi VAR-i dalloi një goditje të tij ndaj Hugo Duro. Ai la fushën mes fyerjeve dhe provokimeve të tifozëve në ‘Mestalla’.
Ai karton i kuq është fshirë nga drejtësia sportive në Spanjë dhe ky është një vendim historik, sepse nuk është marrë kurrë më parë. Në argumentimin e vendimit shpjegohet se për arbitrin ishte “e pamundur të vlerësonte në mënyrën më të përshtatshme atë që ndodhi”. Arbitri De Burgos Bengoetxea kishte shkruar në raport se Vinicius u ndëshkua, sepse “goditi në fytyrë një lojtar kundërshtar, kur loja ishte e ndaluar”.
Çështja e racizmit ndaj Vinicius mori përmasa të mëdha menjëherë, pati edhe reagime nga politika, madje të ashpra. Ndoshta heqja e kartonit të kuq mund ta zbutë pak situatën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
