Nga Gazeta ‘Si’- Në mbledhjen e sotme të këshillit të ministrave është miratuar akti për zgjatjen e afateve vlefshmërisë së dokumenteve të identifikimit.
Ministri i Brendshëm Ervin Hoxha, deklaroi se janë rreth 500 mijë shtetas shqiptarë që u ka përfunduar vlefshmëria e dokumenteve të identifikimit. Tashmë ata do mund të votojnë në zgjedhjet parlamentare të 11 majit.
“Sot këshilli i ministrave vendosi për zgjatjen e afatit për vlefshmërinë e dokumenteve të identifikimit, që do të zgjidhë shumë shpejt të gjithë këtë ngërçin e krijuar, janë rreth 500 mijë shtetas shqiptarë që u ka përfunduar vlefshmëria e dokumenteve të identifikimit. Në këtë mënyrë, me miratimin e këtij akti, do të kenë mundësinë të gjithë shtetasit shqiptarë që jetojnë jashtë vendit, për të ushtruar të drejtën e votës si e drejtë kushtetuese”, tha Hoxha.
Hoxha theksoi se “me miratimin e këtij aktit të gjithë shtetasit shqiptar do të votojnë sipas udhëzimeve të KQZ duke u regjistruar në Platformën Elektronike të Regjistrimit”.
Lidhur me propozimin e Partisë Demokratike që të lejohen të votojnë edhe ata shqiptar që nuk kanë një mjet identifikimi shqiptar, Hoxha tha se kjo nuk parashikohet në ligj.
‘Kjo nuk është e mundur të bëhet, vetëm ata që kanë dokument të skaduar mund të regjistrohen. Ligji nuk e parashikon’, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
