.png)
Kryeministri Edi Rama ka deklaruar gjatë konferencës javore me fokus ekonominë, sot (të martën) se do të ndryshojë taksa progresive për shtresën e mesme në lidhje me të ardhurat personale.
“Fasha e klasës së mesme do të rishikohet. Është përshkallëzuar për lartë dhe duhet riparë”, shtoi Ministri i Rindërtimit Arben Ahmetaj. Paga mesatare sipas ligjit është 55 mijë lek në muaj, por jo detyrimisht ai që paguhet kaq, konsideorhet shtresë e mesme. Ndërsa për opozitën, shtresë e mesme konsiderohen të gjitha pagat rreth 100 mijë lek në muaj.
Gjithashtu kryeministri Rama parashikon që pas efekteve të krizës këtë vit, rimëkëmbja nis në 2021 dhe ekonomia do të rritet vitin e ardhshëm me 6%.
Duke rikujtuar rritjen e pagave për sektorin e shëndetësisë dhe arsimit përkatësisht me 40% dhe 15%, kreu i qeverisë ia dedikoi diskutimin garës mes taksës progresive dhe asaj të sheshtë.
“Janë 166 mln dollarë në këto vite, të cilat ata ua merrnin njerëzve dhe ne ua kemi lënë në arkën e familjeve të tyre dhe në tavolinë. Vetëm nga kursimi i taksës, asaj takse famëkeqe të sheshtë që ne e shëmbëm dhe e kthyem në taksë të ndershme sipas fuqisë paguese dhe ata duan ta rikthejnë për të bërë që infermierët, arsimtarët dhe punonjësit e shtetit me pagë mesatare të paguajnë më shumë se “në thonjza” oligarkët ose “pa thonjza” të pasurit. Gjyshja ime thoshte se “Të gabosh është njerëzore, të insistosh është djallëzore”, por këta po insistojnë në gabimin e tyre duke dashur të rikthejnë shkatërrimin”, u shpreh kryeministri Rama duke bërë me dije se javën e ardhshme do të komunikojë ndryshime të tjera që lidhen me taksimin e ndershëm në funksion të asaj pjese të shtresës së mesme që është në piramidën e taksimit për të ardhurat personale.
Sipas llogarive të financave, fatura e vendimit për shkarkimin e barrës së biznesit të vogël është 500 mln nga tatim fitimi dhe 3,3 mld lekë nga TVSH-ja.
Kurse fatura për rritjen e pagave të sektorit shëndetësor dhe arsimor është 8 mld lekë, më shumë se ç’ishte parashikuar në buxhetin afatmesëm, sipas ministres së Financave Anila Denaj.
“Politika e pagave nuk ka lidhje vetëm me vlerën financiare por me politikat sociale, konkurrueshmërinë, taksat etj. Politika jonë është e majtë dhe sociale në themel. Taksa progresive ka çuar shtesë në xhepat e shqiptarëve 960 mln dollarë gjatë qeverisjes sonë, pavarësisht bolorisë politike. Prandaj maxhoranca e ka vijë ndarëse taksën progresive dhe si flamur në vazhdim. Me një të rënë të lapsit 46 mln dollarë ua marrin atyre në nevojë dhe ia çojnë 8% të popullsisë që ata i quajnë oligarkë”, tha ministri Ahmetaj.
Lidhur me atë çfarë është në interes të bizneseve, kredia përmes garancive sovrane, ministrja Denaj bëri me dije se në bazë të analizave dhe nevojave të bizneseve mund të shtyhet në kohë.
Në konferencë kryeministri në përgjigje të intersit të gazetarëve foli për grevën e urisë së naftëtarëve të Ballshit dhe PPP-ve.
Ai e konsideroi kriminale procesin e privatizimit të rafinerisë që në krye të herës dhe sipas tij rrugëtimi i saj nuk kishte si të ndodhte ndryshe.
“Ajo është kompani private, e privatizuar në mënyrë kriminale dhe janë pasojat e një procesi privatizimi kriminal ku jemi përfshirë në mënyrë të vazhdueshme për të lehtësuar pasojat. Kemi ndihmuar sa kemi mundur, por për të na fajësuar që ne jemi përgjegjës për këtë është e tepërt. Kemi bërë dhe do bëjmë çmos , por është një ndërmarrje që në krye të herës ka qenë problematike. Në atë ndërmarrje nuk u bënë investime serioze që mund ta ripërtërinin të gjithë strukturën. Ajo rafineri është keqshfrytëzuar që në fillim. Jam I shqetësuar, por e rëndësishme është të bëjmë diçka”- u shpreh Rama.
Kurse për privatizimet përmes Partneritetit Publik Privat, kryeministri këmbënguli se janë thjesht investime të domosdoshme që buxheti nuk i përballon dot dhe i paguan në kohë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
