Qeveria do të kërkojë në tregjet e huaja mbi 500 mln euro borxh brenda muajit nëntor

Qeveria do të dalë në tregjet ndërkombëtare për të kërkuar minimalisht 500 milionë euro borxhe. Projektligji për të dalë në këto tregje është miratuar në mbledhjen e kësaj të mërkure dhe pritet që të paraqitet në Kuvend brenda javës së ardhshme.

Ministrja e Ekonomisë dhe e Financave, Delina Ibrahimaj tha para gazetarëve në përfundim të mbledhjes së qeverisë se synohet që Eurobondi të emëtohet brenda këtij muaji, ose në fillim të muajit nëntor. Shuma e kërkuar do të jetë nga 500 deri në 700 milionë euro.

Ibrahimaj u shpreh se do të synohet emëtimi i këtij Eurobondi në momentet kur tregjet ndërkombëtare financiare kanë interesat e ulta, megjithëse njohu vështirësitë dhe problematikat në këto tregje për shkak të krizës energjitike dhe politikave monetare të bankave qendrore që kanë shtrënguar kriteret e kreditimit.

Ibrahimaj thotë se dalja në tregjet ndërkombëtare do të jetë edhe një mundësi e mirë për të testuar besueshmërinë e ekonomisë shqiptare dhe gatishmërinë e këtyre tregjeve për të investuar në Shqipëri.

“Në të gjitha rastet ka qenë një test i Qeverisë për të testuar tregjet dhe gatishmërinë e tyre për të financuar qeverinë shqiptarë. Ndër vite shuma e marrë është rritur dhe interesat janë ulur”, tha ajo.

Paratë e siguruara nga ky Eurobond, sipas ministres Ibrahimaj do të përdoren për mbështetje buxhetore, për këtë vit dhe për vitin e ardhshëm në fushat si arsim, shëndetësi dhe infrastrukturë.

Kjo është hera e pestë që Shqipëra del në tregjet ndërkombëtare duke emëtuar një Eurobond. Eurobondi i fundit i Shqipërisë mori miratimin nga tregjet e kapitaleve në qershor 2020 në kërkim të financimit të ekonomisë post-Covid. 650 milionë euro ishte vlera që vendi ynë kërkoi në tregjet ndërkombëtare në formën e eurobondit, 250 milionë euro për të financuar Eurobondin e marrë në vitin 2015, që ishte në vlerën e 450 milionë euro me normë interesi 5.75% dhe që i mbaroi afati i shlyerjes në 12 nëntor 2020, ndërsa pjesa tjetër për tërmetin që goditi Shqipërinë vitin e kaluar dhe shpenzimet.

Në vitin 2010 Shqipëria shënoi daljen e saj të parë në tregjet e kapitalit për të marrë një Eurobond me vlerë 300 milionë euro, arriti të siguronte një interes në kupon fiks prej 7.5% dhe një afat maturimi 5-vjeçar.

Dalja e dytë e Shqipërisë ishte më 5 nëntor 2015 për 450 milionë euro. Kuponi fiks i siguruar në këtë dalje ishte 5.75% me 5 vjet maturim dhe dalja e tretë në 2018 mban interesin më të ulët historik të arritur nga Shqipëria në tregjet e kapitalit. Nga kjo dalje u emetuan 500 milionë euro me një kupon fiks prej 3.55% dhe afat maturimi 7-vjeçar.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.