Gazeta Si – Lionel Mesi debuton me gol në Major League Soccer (MLS), në një ndeshje që e nisi nga stoli. Ylli argjentinas realizoi golin e 2-të në fitoren 2-0 të Inter Majemit ndaj Nju Jork Red Bulls në transfertë. Skuadra e tij nuk fitonte në debutim prej 11 kampionatesh radhazi.
Mesi u fut në fushë në minutën e 60-të, bashkë me ish-shokun e skuadrës te Barcelona, Serxhio Buskets. Inter Majemi kishte shënuar më parë me Diego Gomez, pas një asisti të Zhordi Albës, një tjetër ish-lojtar i BarcelonëS. Në këtë ndeshje për klubin e Bekham debutuan 6 lojtarë të rinj.
Koret ‘Duam Mesin!’ filluan të dëgjoheshin pak minuta pasi nisi ndeshja në ‘Red Bull Arena’ të Herrison, shtëpia e Red Bulls. Publiku u kënaq në mesin e pjesës së dytë, kur Mesi u fut në fushë dhe më pas shënoi edhe golin e 2-të.
Më shumë se 20 mijë tifozë ishin në stadium, me bileta që u shitën deri në 1000 dollarë. Mesi zbarkoi në Majemi më 21 korrik dhe deri tani ka shënuar 10 gola në 7 ndeshje, por ky ishte i pari në kampionat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
