.png)
Një varg studimesh të reja laboratorike po tregojnë pse varianti Omicron shkakton sëmundje më të butë se versionet e mëparshme të koronavirusit.
Në studimet mbi minjtë, Omicron prodhoi infeksione më pak të dëmshme, shpesh të kufizuara kryesisht në rrugët e sipërme të frymëmarrjes: hundë, fyt dhe grykë. Varianti i bëri shumë më pak dëm mushkërive, shumë ndryshe nga variantet e mëparshme.
“Është e drejtë të thuhet se po shfaqet ideja e një sëmundjeje që manifestohet kryesisht në sistemin e sipërm të frymëmarrjes,” tha Roland Eils, një biolog në Institutin e Shëndetit në Berlin.
Në nëntor, kur u raportua se varianti Omicron doli nga Afrika e Jugut, shkencëtarët mendonin vetëm se si mund të sillet ndryshe nga format e mëparshme të virusit. Gjithçka që ata dinin ishte se kishte një kombinim dallues dhe alarmues prej më shumë se 32 mutacionesh gjenetike. Hulumtimet e mëparshme kishin treguar se disa nga këto mutacione u mundësonin korona viruseve të kapeshin më fort mbi qelizat. Të tjerë lejuan që virusi të shmangte antitrupat, të cilët shërbejnë si një linjë e hershme e mbrojtjes kundër infeksionit. Por se si varianti i ri mund të sillet brenda trupit ishte një mister.
"Nuk mund të parashikosh sjelljen e virusit vetëm nga mutacionet," tha Ravindra Gupta, një virologe në Universitetin e Kembrixhit.
Gjatë muajit të kaluar shumë studime, duke përfshirë atë të Guptas, kanë vëzhguar patogjenin e ri në laborator, duke infektuar qelizat e minjve me Omicron. Ndërsa punonin, Omicron u rrit në të gjithë planetin, duke infektuar me lehtësi edhe njerëzit që ishin vaksinuar ose ishin shëruar nga infeksionet. Por ndërsa rastet u rritën, shtrimet në spital nuk pësuan rritje. Studimet e hershme të pacientëve treguan se Omicron kishte më pak gjasa të shkaktonte sëmundje të rënda sesa variantet e tjera, veçanërisht te njerëzit e vaksinuar.
Të mërkurën, një raport i madh shkencëtarësh japonezë dhe amerikanë trgoi se tek kafshët e infektuar me Omicron kishin më pak dëmtime në mushkëri, humbën më pak peshë dhe kishin më pak gjasa të vdisnin, zbuloi studimi.
"Kjo ishte befasuese, pasi çdo variant tjetër i ka infektuar fuqishëm këta lloj brejtësish," tha Michael Diamond, një virolog në Universitetin e Uashingtonit dhe një bashkautor i studimit.
Arsyeja që Omicron është më i butë mund të jetë një çështje anatomie. Diamond dhe kolegët e tij zbuluan se niveli i Omicron në hundën e brejtëseve ishte i njëjtë me atë të kafshëve të infektuara me një formë të mëparshme të koronavirusit. Por nivelet e Omicron në mushkëri ishin një e dhjeta ose më pak e nivelit të varianteve të tjera.
Një studim i ngjashëm erdhi nga studiuesit në Universitetin e Hong Kongut, të cilët studiuan pjesët e indeve të marra nga rrugët e frymëmarrjes tek disa njerëz. Në 12 mostra të mushkërive, studiuesit zbuluan se Omicron u rrit më ngadalë se Delta dhe variantet e tjera. Studiuesit gjithashtu infektuan indet nga bronket, tubat në pjesën e sipërme të gjoksit që dërgojnë ajrin nga gryka në mushkëri. Dhe brenda atyre qelizave bronkiale, në dy ditët e para pas një infeksioni, Omicron u rrit më shpejt se Delta ose koronavirusi origjinal.
Infeksionet e koronavirusit fillojnë në hundë ose ndoshta në gojë dhe përhapen në fyt. Infeksionet e lehta nuk shkojnë shumë më larg se kaq. Por kur koronavirusi arrin në mushkëri, mund të shkaktojë dëme serioze.
Qelizat imune në mushkëri mund të mbireagojnë, duke vrarë jo vetëm qelizat e infektuara, por edhe ato të pa infektuara. Ato mund të prodhojnë inflamacion të largët, duke shkaktuar dhëmbëza në muret delikate të mushkërive. Për më tepër, viruset mund të shpëtojnë nga mushkëritë e dëmtuara në qarkullimin e gjakut, duke shkaktuar mpiksje dhe duke shkatërruar organe të tjera. Gupta dyshon se të dhënat e reja të ekipit të tij japin një shpjegim molekular përse Omicron nuk përhapet aq mirë në mushkëri.
Shkencëtarët e dinë se një pjesë e ngjitjes së Omicron vjen nga aftësia e tij për të shmangur antitrupat, duke e lejuar atë të futet në qelizat e njerëzve të vaksinuar shumë më lehtë se variantet e tjera. Por ata dyshojnë se Omicron ka edhe disa avantazhe të tjera biologjike.
Javën e kaluar, studiuesit raportuan se varianti mbart një mutacion që mund të dobësojë të ashtuquajturin imunitet natyral . Por do të duhen më shumë eksperimente për të parë nëse ky është me të vërtetë një nga “sekretet” Omicron.
Burimi:The New York Times/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
