Protestuesit në Leposaviç kanë tentuar të hyjnë me dhunë në ndërtesën e komunës, por nuk janë lejuar nga ushtarët e KFOR-it.
Ata besuan se aty është duke u mbajtur një takim mes ministrit të Pushtetit Lokal të Kosovës, Elbert Krasniqi, dhe kryetarit të komunës, Lulzim Hetemi.
Ata janë organizuar dhe kanë kaluar kordonin e ushtarëve hungarezë, mirëpo, janë ndaluar nga ushtarët tjerë të cilët ndodhen në hyrje të ndërtesës.
Pas një bisede të shkurtër me pjesëtarët e misionit të NATO-s, KFOR, të cilët ruajnë ndërtesën e komunës, zyrtari i Listës Serbe, Zoran Todiç, i ftoi të tubuarit t’i afrohen ndërtesës së komunës dhe, siç u shpreh, të hyjnë në vendet e tyre të punës.
Todiç është ish-kryetar i Komunës së Leposaviçit sipas sistemit të Kosovës, por, në të njëjtën kohë, mban edhe pozitën e kryetarit të Autoritetit të Përkohshëm Komunal, që funksionon sipas sistemit serb.
Drejtori i Zyrës për Kosovën në Qeverinë e Serbisë, Petar Petkoviç, shkroi në llogarinë e tij në Twitter se ky është një “provokim i ri”.
“Për këto lëvizje të dhunshme [të kryeministrit të Kosovës, Albin] Kurti e kam informuar menjëherë [të dërguarin e posaçëm të Bashkimit Evropian për dialogun Kosovë-Serbi, Mirosllav] Lajçak”, tha Petkoviç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
