15 protestues janë proceduar penalisht për protestën para Kryeministrisë ditën e djeshme kundër masës më të re të qeverisë për mbajtjen e maskës me detyrim edhe në rrugë.
Protesta u mbajt dje pasdite tek bulevardi ”Dëshmorët e Kombit”, teksa Policia ndërhyu dhe shoqëroi disa persona.
Nga protesta nuk ka pasur të arrestuar, por vetëm të proceduar.
“Nga specialistët për Hetimin e Krimit në Komisariatin e Policisë Nr. 2, filloi procedimi penal ndaj 15 shtetas, pasi ditën e djeshme në bulevardin ‘Dëshmorët e Kombit’, kanë organizuar dhe protestuar në kundërshtim me masat anti-Covid. Gjithashtu në zbatim të Aktit Normativ, shërbimet e Policisë kanë proceduar me masat administrative përkatëse gjobë për 15 shtetasit”, thuhet në njoftimin e policisë.
Qytetarët protestuan kundër mbajtjes së maskës me detyrim edhe në rrugë, me pretendimin se ajo nuk të mbron.
Qytetarët protestues kanë hequr maskat e tyre dhe më pas i digjnin në një kazan në shenjë proteste.
Grumbullimi i tyre, i cili nuk lejohet sipas aktit normativ në fuqi që nga nisja e pandemisë, ka bërë që policia të bëjë disa herë thirrje për t’u larguar, thirrje që nuk janë dëgjuar nga qytetarët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
