Gazeta Si – Grupi kriminal i Laert Haxhiut, i cili akuzohet për 6 vrasje , 4 në Shqipëri dhe 2 në Greqi, do të hetohet nga Prokuroria e Posaçme në Tiranë.
Prokuroria e Elbasanit ka shpallur moskompetencën për grupin e Haxhiut dhe çështjen ia ka kaluar SPAK-un për hetim.
Në 4 tetor të këtij viti, drejtuesi i Prokurorisë së Elbasanit, Kreshnik Ajazi, shkoi në ambientet e SPAK për të zhvilluar një takim me prokurorët e SPAK dhe hetuesit e Byrosë Kombëtare të Hetimit (BKH).
LEXO EDHE:
– 6 vrasjet (2 në Greqi) që zbuloi bashkëpunëtori i drejtësisë Artan Tafani për llogari të grupit të Laert Haxhiut
– Video / Si u arrestua Artan Tafani në një hotel, i penduari që shkatërroi grupin e Laert Haxhiut
Një takim që i parapriu vendimit që dosja t’i kalojë për më shumë kompetenca SPAK-ut.
Një pjesë e anëtarëve të grupit, u godit gjatë operacionit “Kurrë mos harro” pas dëshmisë së Artan Tafanit.
Ky i fundit, anëtar i bandës, u bë bashkëpunëtor i drejtësisë dhe rrëfeu para prokurorëve disa prej krimeve gjatë viteve 2021-2023.
Nga dëshmia e Tafanit u zbardhën 6 vrasje si dhe krime të tjera, por që një pjesë tjetër janë ende në proces verifikimi dhe hetimi.
Por ajo që tronditi më shumë ishte planifikimi i Haxhiut për të vrarë persona të drejtësisë. Në mesin e tyre ishte prokurorja e SPAK, Doloreza Musabelliu, dhe ajo e Lushnjës, Merita Selimi, për të cilat me urgjencë të madhe u mor vendimi për mbrojtjen e tyre.
Në muajin korrik Haxhiut iu provua edhe autorësia e një tjetër vrasje, ajo e Besnik Hidës, i afërm i Zamir Latifit, njërit prej viktimave të masakrës së Lushnjës në 2017-ën.
Për këtë të fundit Haxhiu, i cili ndodhet në paraburgim në Greqi, po gjykohet në Gjykatën e Posaçme, ndërsa me burgim të përjetshëm janë dënuar më herët bashkëpunëtorët Anterio Kaloshi dhe Orgest Bilbili.
Ai u kap në Janinë, ndërsa shërbimet e policisë së shtetit helen i gjetën leje qëndrimi greke të falsifikuar, me emrin Mikis Askalidis 32 vjeç, lindur në Gjeorgji.
Tre ditë më parë, Greqia vendosi që i shumëkërkuari i drejtësisë shqiptare do të ekstradohet në vendin tonë.
Gjykata Apelit në shtetin fqinj vendosi të mërkurën ekstradimin e 31-vjeçarit nga Lushnja, duke rrëzuar një vendim të dhënë dy muaj më parë nga Gjykata e Shkallës së Parë në Janinë.
Megjithatë, firmën e fundit për ekstradimin e tij në Shqipëri e ka ministri i Drejtësisë greke.
Grupi kriminal
1-Artan (Marjus) Tafani, 39 vjeç
2-Lulzim Spahija (Arapi), 28 vjeç
3-Ligor Romaçka, 31 vjeç
4-Erisiano Abedini, 32 vjeç
5-Bledar Berberi, 34 vjeç
6-Maringlen Topuzi, 37 vjeç
7-Bujar Abedini, 49 vjeç
8-Enriko Xhahysa, 23 vjeç
9-Klea Gjata, 27 vjeçe,
10-Idriz Manej, 68 vjeç
11-Fatjon Veliu, 36 vjeç
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
