Profesori italian i arrestuar në Shqipëri, gruaja e tij: Ka kriza të vazhdueshme psikologjike

Nga Gazeta Si- “Michele është vetëm, duke vuajtur nga kriza të vazhdueshme psikologjike, larg shtëpisë dhe në një vend gjuhën e të cilit nuk e kupton. Paraburgimi po e lodh çdo ditë.” Këto janë fjalë e Vanessa Castelli, gruaja e Michele D’Angelo, profesorit nga L’Aquila i cili është ndaluar në Shqipëri për më shumë se një muaj e gjysmë, i akuzuar për “shkelje të rregullave të trafikut” dhe “braktisje të një automjeti” pasi u përfshirje në aksidentin tragjik me makinë në Fier më 8 gusht, ku humbi jetën një person dhe u plagosën 3 të tjerë.

“Paraburgim jo i drejtë”

Ndërsa ai mbetet në burg, Castelli po lufton nga Italia për lirimin e tij.

Ajo thotë se D’Angelo ka qenë bashkëpunues me autoritetet dhe kishte besim tek sistemi i drejtësisë shqiptare, por sipas saj, paraburgimi është i tepërt.

Gruaja e tij, gjithashtu profesoreshë në Universitetin e L’Aquila thotë se është një gjendje jashtëzakonisht e vështirë, veçanërisht duke pasur parasysh sjelljen e tij dhe historinë e tij personale dhe profesionale.

“Ka mënyra alternative që mund të sigurojnë pajtueshmërinë me procedurat pa kompromentuar më tej shëndetin e tij psikologjik”, thotë ajo.

Mbledhja e fondeve e Universitetit të L’Aquila-s

Ministria e Punëve të Jashtme Italiane ka ndërhyrë gjithashtu në këtë rast, ndërsa drejtoresha e Departamentit të Mjekësisë Klinike, Shëndetit Publik, Shkencave të Jetës dhe Mjedisit, Anna Maria Cimini, së bashku me kolegë të tjerë, ka nisur një mbledhje fondesh për shpenzimet ligjore, e cila tashmë ka marrë mbështetje nga departamente të tjera.

“Michele është thellësisht mirënjohës për mbledhjen e fondeve të iniciuar nga Profesoresha Cimini, sepse ai e di shumë mirë se me sa shpenzime përballemi çdo ditë: ligjore, burgu, por edhe që lidhen me udhëtimin dhe akomodimin për vizita dhe takime me avokatë. Ky solidaritet na mbështet, moralisht dhe materialisht”, thotë Castelli, e cila ishte pranë tij atë mbrëmje dhe thotë se një Mercedes që udhëtonte me shpejtësi të lartë i goditi përpara se të përmbysej në rrugë.

“Në atë moment, Michele, në gjendje konfuzioni, lëvizi makinën tonë për të na çuar në një vend të sigurt dhe për të thirrur ndihmë. E dinim që nuk duhej bërë, por në panik, na dukej gjëja e duhur për të bërë në atë moment.”

“Në këtë kohë,” shton ajo, “ndihem e mbështetur mbi të gjitha nga disa institucione dhe individë që kanë zgjedhur të flasin me guxim dhe humanizëm”, thotë ajo, duke përmendur senatorin Luciano D’Alfonso, i cili ka treguar angazhim konkret në përpjekjen për t’i dhënë zë situatës së tyre.

Ajo thotë se apeli nga kryetarja e bashkisë së San Severo, Lidya Colangelo, drejtuar Presidentit Mattarella ishte gjithashtu një gjest i rëndësishëm, “i cili na dha shpresë dhe na bëri të ndihemi më pak të vetmuar.”

Prandaj, komuniteti akademik dhe institucionet italiane po bëjnë thirrje për masa alternative ndaj paraburgimit, të cilat i konsiderojnë joproporcionale, dhe po bëjnë thirrje me forcë për kthimin e menjëhershëm të profesorit në Itali.

“Dinjiteti le të jetë në zemër të bashkëpunimit midis shteteve.”

“Nëse mund të shtoj diçka,” përfundon gruaja e D’Angelo-s, “është se bashkëpunimi midis shteteve duhet të ketë gjithmonë në thelb dinjitetin njerëzor. Ne vazhdojmë të shpresojmë, të luftojmë dhe të besojmë se e vërteta do të dalë në dritë.”

Sipas Drejtorisë vendore të policisë Fier, nga veprimet hetimore ka rezultuar se shkaku i aksidentit dyshohet të jetë ndërprerja e rrugës nga automjeti i drejtuar nga profesori italian i cili më pas është larguar nga vendngjarja./Corriere della Sera/