Gazeta Si – Ministria publike në Zvicër ka kërkuar në seancë 20 muaj burgim për Sep Blater dhe Mishel Platini. Dy ish-drejtuesit e lartë të futbollit botëror ishin në sallë për t’iu përgjigjur akuzave për mashtrim dhe korrupsion.
Hetimi ka të bëjë me një pagesë prej 2 milionë frangash (plus 229 mijë taksa), që FIFA ia ka kaluar ish-presidentit të UEFA-s, Platini.
Prokurori ka pohuar se te të pandehurit “nuk shihet asnjë shenjë pendimi, ata kanë pasur mundësi të vendosin lirisht në favor apo kundër ligjit”. Dhe kanë zgjedhur hipotezën e dytë “pa asnjë arsye të bazuar”.
Blater ka deklaruar gjatë marrjes në pyetje se “ajo shumë ishte detyrim”, pasi Platini kishte bashkëpunuar që nga koha e zgjedhjes së tij në UEFA në 1998-ën.
Francezi ishte këshilltar i FIFA-s për një pagesë prej 1 milion frangash në vit. Problemi, sipas Prokurorisë, është se nuk ka gjurmë në asnjë protokoll të FIFA-s për kryerjen e transaksionit në 2011-ën.
Për këtë arsye Blater dhe Platini janë aktualisht nën hetim. Prokuroria nuk ka mundur të rindërtojë skemën se si është arritur në llogarinë e 2 milionë frangave, sepse arsyet e dhëna nga Blater nuk ishin shumë të qarta.
Ish-presidenti i FIFA-s ka shpjeguar se ka kaluar më pak se 1 milion euro në vit, për shkak të vështirësive financiare të vetë institucionit. Një variant i hedhur poshtë nga Prokurori, sepse FIFA në fakt e ka pasur arkën plot. Madje, rezervat e saj në 2002-shin kapnin shifrën e 327 milionëve.
Pyetjes për autorizimin e munguar të federatës, Blater nuk iu përgjigj. Ai tha: “FIFA nuk më përgjigjet që prej 2016-ës, ndaj do të bëj të njëjtën gjë”.
Kurse Platini është shprehur: “Ajo që FIFA më ka bërë mua dhe ish-presidentit të saj është një skandal. E vërteta do të dalë në shesh, drejtësia do të triumfojë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
