.png)
Gazeta Si – Presidenti bullgar Rumen Radev ka njoftuar dorëheqjen e tij, e cila tani duhet të ratifikohet nga Gjykata Kushtetuese.
Ky veprim, sipas mediave bullgare që e kishin pritur, është një hap përgatitor për një kandidaturë në zgjedhjet parlamentare të këtij viti, me shumë mundësi duke formuar një parti të re, megjithëse Radev më parë ishte mbështetur nga Partia Socialiste Bullgare dhe nuk përjashtohet që ai të bashkohet ose të bashkëpunojë me të.
Data nuk është caktuar ende, por qeveria ra në dhjetor pas javësh protestash, më të mëdhatë në vitet e fundit.
Gjatë protestave, Radev i bëri presion qeverisë të jepte dorëheqjen. Të hënën, ai mbajti një fjalim të fuqishëm, duke thënë se donte të luftonte “të korruptuarit dhe bashkëpunëtorët e tyre”.
Kjo me shumë gjasa ishte një përpjekje për të shfrytëzuar protestat, të cilat filluan kundër ligjit të buxhetit, por u përhapën për të adresuar një sërë problemesh sistemike në Bullgari, siç janë korrupsioni dhe inercia politike.
Radev ka qenë në detyrë që nga viti 2017 dhe mandati i tij i dytë dhe i fundit pesëvjeçar do të kishte skaduar vitin e ardhshëm.
Gjatë paqëndrueshmërisë së zgjatur politike të vendit – zgjedhjet e ardhshme do të jenë të tetat në katër vjet – ai kishte rritur kompetencat e tij, të cilat përndryshe ishin kryesisht përfaqësuese.
Për shembull, ai kishte shfrytëzuar boshllëkun institucional për të emëruar aleatë në kompanitë shtetërore. Ai është një ish-gjeneral i forcave ajrore dhe mban pozicione në politikën e jashtme që konsiderohen pro-ruse.
Nëse Gjykata mbështet dorëheqjen e tij, zëvendëspresidentja aktuale, Iliana Iotova do të zërë vendin e tij deri në zgjedhjet presidenciale të nëntorit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
