Prej dhjetë ditësh situata në veri është e tensionuar dhe barrikadat vazhdojnë në rrugët kryesore të vendosura nga serbët lokalë, që po mbështeten edhe nga serbët në Serbi përmes protestave.
Dje(18 dhjetor) në anën serbe të veriut u mbajt një protestë nga serbët, të cilët dëshironin të hynin në Kosovë, dhe sipas ekspertëve të sigurisë planifikonin që t’i vinin flakën pikës kufitare në Jarinjë.
Por, kjo nuk u arrit pasi Policia e Serbisë kishte formuar një kordon për të mos i lejuar të hynin në Kosovë, ku ishte vendosur edhe një tel gjembor.
Në protestë u panë dhjetëra serbë të maskuar, të cilët bënin thirrje nacionaliste si “Kosova është Serbi”. Prezencën e grupeve kriminale serbe nuk e ka mohuar as KFOR-i.
Në komunikatën e tyre pas kësaj proteste thuhet “Pas koordinimit aktiv me të gjitha palët, Forca e Kosovës – KFOR-i, komanda rajonale e KFOR-it ‘Lindje’ ka shtuar praninë e saj në Jarinjë për arsye parandaluese të sigurisë. Kjo rritje vjen si pasojë e prezencës së mundshme të grupeve të organizuara kriminale brenda protestuesve”.
Pas kësaj proteste reagoi edhe ministri i Punëve të Brendshme të Kosovës, Xhelal Sveçla, i cili është shprehur se Policia e Kosovës është e aftë të përballet me strukturat kriminale.
“Por, gjithashtu dua të siguroj të gjithë qytetarët tanë se Policia e Kosovës është e aftë dhe ka gjitha kapacitetet e nevojshme te përballet me këto struktura kriminale dhe se ne po bëjmë gjithë vlerësimet e nevojshme për mënyrën më efikase dhe kohën e përshtatshme për këtë. Qëllimi ynë i vetëm është të sigurojmë një ambient të sigurt për të gjithë qytetarët pa dallim, të sigurojmë lëvizjen e lirë për të gjithë dhe të luftojmë grupet kriminale pa dallim, në të mirën e të gjithë qytetarëve dhe në mbrojtje të integritetit territorial dhe sovranitetit të Republikës sonë”, shkroi ndër të tjera Sveçla.
Ndërkohë presidenti serb, Aleksandar Vuçiç, ka kërcënuar me dërgimin e një mijë trupave në veri, madje ai e ka dërguar këtë kërkesë në KFOR, i cili është përgjigjur se po e shqyrtojnë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
