Portikët e Bolonjës pranohen në UNESCO

Portikët e Bolonjës (ndërtesat me arkitekturë të veçantë prej harqesh dhe çati të mbështetura në kolona) bëhen pjesë e listës së Trashëgimisë Botërore të UNESCO-s.

Vendimi u mor në takimin e Komitetit të 44-të të Trashëgimisë Botërore në Fuzhou, Kinë. Në këtë sesion të UNESCO-s, Italia arriti të marrë miratimin për tre sajte të trashëgimisë kulturore, dy të tjerat llixhat e Montecatinit dhe afresket e Padovës.

“Një rezultat fantastik për Bolonjën dhe Italinë. Jemi në krye të listës, kemi dy sajte më shumë se Kina. Është një ditë e bukur për trashëgiminë kulturore kombëtare”, është shprehur ministri i Kulturës, Dario Francheschini.

Më parë, organi konsultues i UNESCO-s ua refuzoi statusin portikëve të Bolonjës, por kjo u pasua me një angazhim të fortë diplomatik nga Italia.

Portikët janë element karakteristik i Bolonjës. Vetëm në qendrën historike, Bolonja ka më shumë se 38 km portikë dhe 53 km të tjera jashtë qytetit.

Ndër to është portiku i San Luca-s, më i gjati në botë, me 3 796 metra gjatësi dhe 666 harqe të mrekullueshme.

Portikët e parë datojnë që nga viti 1041, kohë kur qyteti po përjetonte një rritje të popullsisë, për shkak të Universitetit të Bolonjës, i cili tërhoqi shumë studentë dhe akademikë dhe imigracionit nga fshatrat afër. Qyteti u përball me një emergjencë të vërtetë strehimi dhe lindi nevoja për hapësira të reja urbane. Prandaj, qytetarët vendosën të rrisin kapacitetin në m3 të shtëpive të tyre, duke zgjeruar katet e sipërme me anë të trarëve prej druri që mbështeteshin në trarët mbajtës të papafingove.

Me kalimin e kohës, këto hapësira u zgjeruan dhe lindi nevoja të ndërtoheshin kolona mbështetëse nga poshtë, për të mbajtur peshën. Kështu lindën portikët. Bolonjezët e kuptuan menjëherë dobinë e portikëve, që ofronin mbrojtje nga dielli dhe moti i keq, duke u lejuar qytetarëve dhe turistëve të lëviznin nëpër qytet në çdo lloj moti. Portikët favorizuan edhe zhvillimin e aktiviteteve tregtare dhe artizanale, si dhe i bënë katet përdhese më të banueshme, duke i larguar ato nga papastërtia e rrugëve.

Në 1288, Komuna e Bolonjës vendosi që të gjitha shtëpitë e reja duhet të ndërtohen me një portik murature, ndërsa atyre ekzistuese iu kërkua ta shtonin një të tillë. Megjithatë, deri tani kanë mbijetuar tetë portikë prej druri.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.