.png)
Policia ka shuar dyshimet për vendndodhjen e Alqi Bllakos.
Prej mbrëmjes së shkuar ndodhet në Drejtorinë e Policisë Vendore Tiranë. Ky njoftim i policisë shuan të gjithë aludimet se ish deputeti socialist është arratisur.
“Drejtoria e Përgjithshme e Policisë së Shtetit, informon publikun se përkundër disa lajmeve të rreme mbi arratisjen e shtetasit Alqi Bllako, ky shtetas ndodhet në Drejtorinë Vendore të Policisë Tiranë që prej mbrëmjes së djeshme.
Sqarojmë se shtetasi Alqi Bllako është vetëdorëzuar konform detyrimit ligjor për zbatimin e masës së sigurisë “Arrest në burg”, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar”, thuhet në njoftim.
Një ditë më parë, Policia zbatoi urdhër arrestet e zyrtarëve të akuzuar nga SPAK në dosjen e inceneratorëve.
Pëllumb Abeshi hyri me pranga në duar në Drejtorinë e Policisë së Tiranës. Por thuhej se policisë i mungonte një nga ‘peshqit e mëdhenj’.
Ndonëse u ngritën dyshime për Alqi Bllakon, policia reagoi mëngjesin e sotëm duke treguar se ku ndodhet.
Urdhri për arrestimin e tij u dha në mesditën e së enjtes pasi Gjykata Speciale Anti- Korrupsion miratoi kërkesën e SPAK.
Ndërsa kuvendi kishte konfirmuar se Alqi Bllako nuk ishte më deputet socialist dhe nuk kishte më imunitet.
Bllako me anë të një statusi në Facebook njoftoi dorëheqjen si deputet dhe përballjen me drejtësinë pa imunitet.
Ish-deputeti socialist akuzohet se në kohen kur ishte sekretar i Përgjithshëm i Ministrisë së Mjedisit ka shpërdoruar detyrën duke falsifikuar së bashku me ministrin Lefter Koka dokumentet zyrtare të shpronësimit të tokës në Fier ku do ndërtohej inceneratori i Fierit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
