.png)
Gazeta Si – Në Gjykatën e Posaçme, u mbajt këtë të premte seanca e radhës ndaj ish-anëtarit të bandës së Durrësit, Plarent Dervishaj i cili akuzohet për organizimin e atentatit më 1 nëntor 2019 në Durrës ndaj ish-prokurorit Arjan Ndoj, ku mbeti i vdekur shoferi i tij, Andi Maloku.
Dervishaj ka kërkuar që seancat gjyqësore të tij të mbahen me dyer të mbyllura me pretendimin se shumë prej deklaratave të dëshmitarëve janë shtrembëruar në publikimet e mediave.
Gjykata nuk e pranoi këtë kërkesë të dorëzuar nga avokatët e të pandehurit. Në këtë moment, Dervishaj u ka hequr avokatëve të drejtën për ta përfaqësuar në gjyq dhe është larguar nga salla.
“Bëjeni vetë gjyqin, prokurorin ja ku e keni. Nuk do të marrë më pjesë në gjyq”,- mësohet të jetë shprehur Dervishaj.
Ndërsa prokurori i SPAK, Adnan Xholi ka kërkuar që seanca të vijojë duke u shprehur se është e drejta e të pandehurit që të jetë ose jo i pranishëm në sallën e gjyqit.
Po ashtu, gjykata vendosi pezullimin e kohës së paraburgimit. Për B.H., R.Rr. dhe E.S., gjykata vendosi shoqërimin e detyrueshëm të të pandehurve.
Seanca e radhës u caktua për datën 5 dhjetor, ora 12:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
