.png)
Gazeta Si – Gjykata e Posaçme e Apelit la në fuqi vendimin për Leonard Luzin dhe dy bashkëpunëtorët e tij, të cilët tentuan të vrisnin Inez Hajrullën dhe Ervis Matodashajn në Vlorë.
Në këtë mënyrë, Luzi do të vuajë përfundimisht 7 vite e 4 muaj burg. Muharrem Koroveshi për shkak të gjykimit të shkuartuar do vuajë 6 vite e 8 muaj në qeli, ndërsa i penduari i drejtësisë, Amarildo Nikolli alias Xhenje, do të vuajë, me gjykim të shkurtuar 2 vite e 9 muaj burgim.
Sipas Prokurorisë së Posaçme, Leonard Luzi u financua nga një person ende i paidentifikuar për të kryer vrasjet e Ervis Matodashajt dhe Inez Hajrullës ku shkak dyshohet të jenë përplasjet për lojërat e fatit.
Leonard Luzi dyshohet se krijoi një grup të strukturuar kriminal, pjesë e të cilit ishin i pandehuri Amarildo Nikolli, që do të ishte ekzekutori si dhe Muharem Koroveshi e Erio Zejno, në rolin e ndihmësit, ky i fundit ende në kërkim.
Në dosjen e SPAK thuhet se Koroveshi dhe Zejno sollën armët në banesën e Amarildo Nikollit i cili do të kryente ekzekutimin dhe e ndihmuan në terren me gjetjen e personave të cilët ishin objektiv i atentatit. Po ashtu ata do të ndihmonin Nikollin për t’u larguar nga vendi i ngjarjes pas kryerjes së atentatit.
Kjo ngjarje u parandalua nga Policia e Vlorës e cila vendosi në pranga Amarildo Nikollin në zonën e “Ujit të Ftohtë”.
Luzi u ekstradua nga Spanja në Shqipëri në nëntor 2024, pasi ishte shpallur në kërkim ndërkombëtar nga Interpoli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
