Nga Gazeta Si – Një efektiv policie ka mbetur i plagosur mbrëmjen e së enjtes pasi është përplasur nga një automjet që lëvizte në sens të kundërt në lagjen numër 1 të Durrësit.
Mësohet se efektivët e Durrësit i kanë bërë shenjë të ndalojë makinën, por drejtuesi i automjetit Hysen Pici ka vijuar lëvizjen dhe nuk i është bindur urdhrit, duke përplasur punonjësit e policisë.
Për pasojë njëri prej efektivëve, i identifikuar si G.M., mbeti i plagosur rëndë dhe ndodhet në spital për ndihmë mjekësore.
“Sipas informacioneve një automjet lëvizte në sens të kundërt dhe Forcat operacionele të Durrësit i kanë bërë shenjë të ndalojë por drejtuesi i automjetit ka vijuar lëvizjen dhe nuk i është bindur urdhrit, duke përplasur dy punonjës policie, njëri prej të cilëve ndodhet aktualisht në spital për ndihmë mjekësore, jashtë rrezikut për jetën”, thuhet në njoftimin e policisë.
Autori Hysen Pici është ndjekur me vrap nga efektivët, derisa ka rënë në pranga. Ai ishte në gjendje të dehur dhe i armatosur në makinën e tij “Range Rover”. Gjatë ndalimit policia ka qëlluar në ajër.
Dyshohet se Hysen Pici, me origjinë nga Shijaku, ishte nën efektin e lëndëve narkotike kur përplasi efektivët gjatë mbrëmjes së djeshme.
Mësohet se i është bërë edhe testi për drogë, por janë dërguar analizat në Tiranë.
Në Currila ku ndodhi ngjarja ka shkuar dhe Agjencia e Mbikëqyrjes Policore për të verifikuar përgjigjen e policëve.
Policia thotë se grupi hetimor nën drejtimin e Prokurorisë vijon punën për sqarimin e plotë të rrethanave dhe dokumentimin ligjor të kësaj ngjarjeje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
