.png)
Australiani Oscar Piastri u bë piloti i parë që fiton më shumë se një garë në vitin 2025 pas triumfit në “Bahrain Grand Prix”. Australiani tregoi ftohtësinë e një kampioni në garën e 50 në F1 me fitoren e parë të McLaren në Sakhir. Pas një starti të fortë nga pole position – pavarësisht tentativës së George Russell në kthesën 1 – Piastri ndërtoi një kryesim të qëndrueshëm në xhirot që pasuan.
Ndërkohë që Lando Norris mori një penallti prej 5 sekondash për shkak të vendosjes së parregullt në vendin e nisjes – dy makinat McLaren impresionuan edhe pas provës bindëse të britanikut. Kur Safety Car u duk se do të rrezikonte Piastri-n, 24 vjeçari bëri një dalje të pastër në rifillimin e garës duke rritur diferencën deri në 15 sekonda nga ndjekësit.
Russell rezistoi në vendin e dytë pavarësisht provave në fund nga Norris. Nënkampioni në fuqi e mbylli garën vetëm 0.774 sekonda pas Russell. Një rekuperim masiv i pilotit të McLaren pas provave zyrtare të së shtunës. Charles Leclerc u detyrua të qëndrojë në vendin e 4, pavarësisht një nisje të mirë dhe duelit me Norris. Lewis Hamilton e mbylli garën në vendin e 5 përpara Max Verstappen në një mbrëmje të vështirë për pilotin e Red Bull.
Pierre Gasly mori pikët e para për Alpine i ndjekur nga Esteban Ocon pasi strategjia e pilotit të Haas funksionoi në llogarinë e pit stop. Yuki Tsunoda e vendosi Red Bull në vendin e 9 përpara Ollie Bearman që e çoi Haas në të 10 pasi britaniku rekuperoi 10 vende pas startit nga vendi i fundit. Piloti i ditës nga tifozët u shpall Lewis Hamilton.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
