.png)
Industria e peshkimit thotë se është në kufijtë maksimalë të kapaciteve që ka dhe i kërkon Qeverisë që të shqyrtojë mundësi të reja nxitjeje dhe zhvillimi të këtij sektori.
Një prej këtyre mundësive iu shqiptua Kryeministrit Edi Rama në Durrës gjatë një dreke me përfaqësues të kësaj industrie, mes të cilëve edhe sipërmarrësi, Gjergj Luca.
Luca i kërkoi Kryeministrit që të shihet mundësia e qasjes së peshkatarëve tek fondet e Bashkimit Europian, njësoj si bujqësia.
“Nëse ju do ta fusni peshkimin në IPARD, si shembull erdhën 1.5 mln euro këtu për motora, i morën ata që kishin më shumë nevojë dhe nuk u përplas asnjë nga komuniteti (i peshkarëve). Gjithë ato lek shkuan për ata që kishin më shumë nevojë. Tani, nëse peshkimin do ta fusni si industri te IPARD-i, siç e keni fut te bujqësia, që të ketë mundësi që të marrim pak ajër”, tha Luca.
Në këtë takim, Kryeministri Edi Rama renditi politikat lehtësuese të Qeverisë për këtë sektor, përfshirë këtu TVSH-në dhe investimet e bëra tek portet e peshkimit. Ai përmendi projektin për rindërtimin e Portit të Durrësit dhe tha se porti i peshkimit do të përfshihet në të gjithë planin e zhvillimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
