Gazeta Si – Ballkani luajti sot ndeshjen e fundit në Ligën e Konferencës, duke mbyllur kështu edhe rrugëtimin historik në Europë. Skuadra e Dajës u mund 1-0 në Rumani nga Kluzh.
Goli i vetëm u shënua nga Boateng pas 17 minutash lojë. Rumunët fituan edhe një penallti, që u gjuajt dy herë nga Deac, por në të dy rastet ai u ndal nga portieri Stivi Frashëri. Kampionët e Kosovës e kërkuan golin e barazimit, por pa mundur ta gjenin atë.
Ballkani e mbyll fazën e grupeve në vend të fundit, me 4 pikë në 6 ndeshje. Kanë kaluar më tej Kluzhi dhe Sivaspori, ndërsa vendin e tretë e zunë çekët e Sllavias së Pragës.
Pavarësisht rezultateve, duhet theksuar se ishte një përvojë shumë e bukur për skuadrën kosovare. Përveçse hyri në histori me kualifikimin për herë të parë të një ekipi kosovar në fazën e grupeve të një kompeticioni europian, Ballkani impresionoi me nivelin e lojës dhe sidomos me fitoren në Turqi, 3-4 ndaj Sivasporit.
Kjo eksperiencë e bukur do t’i shërbejë këtij ekipi për të ardhmen, ndërsa tani fokusi do të jetë te kampionati.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
