.png)
Tregjet e aksioneve ranë pasi presidenti Donald Trump njoftoi tarifa mbi importet nga vendet e huaja. Rënia u ngadalësua kur ai pezulloi shumicën e tarifave por shenjat e një ekonomie që po goditet janë aktive.
Porti i Los Anxhelosit po e ndjen i pari. “Në thelb të gjitha dërgesat nga Kina për shitësit dhe prodhuesit kryesorë kanë pushuar”, tha Eugene Seroka, drejtori ekzekutiv i portit.
Goditja që Trump i dha ekonomisë po ndihet në të gjithë tregun logjistik botëror. “Ka ngërçe masive, të papërjetuara që prej Covid”, thotë Evan Smith, drejtues i një kompanie furnizimi. “Tarifat janë një shok i madh për sistemin dhe shoku po prek të gjithë zinxhirin. Edhe nëse gjejmë zgjidhje, do të duhen 12 muaj për t’u rimëkëmbur”.
Porti i Los Anxhelosit, më i ngarkuari në hemisferën perëndimore, përpunon rreth 17% të gjithçkaje që Shtetet e Bashkuara importojnë ose eksportojnë në kontejnerë transporti. Porti fqinj i Long Beach përbën 14% të tjera. Me kalimin e viteve, një ekosistem i tërë është krijuar për të mbështetur ngarkimin dhe shkarkimin e makinave, rrobave, pajisjeve elektronike dhe gjërave të tjera që njerëzit duan. Ka punëtorë dhe magazina, kamionë dhe jastëkë ngarkimi, struktura sigurie dhe linja hekurudhore.
Seroka parashikon një rënie me 35% të ngarkesës portuale brenda vitit. Mometalisht duket se janë më të larta shanset për një tjetër rënie se sa për ripërtëritje. Numri i ngarkesave që po anullojnë shkarkimet apo edhe të gjithë udhëtimin po shtohem. Por për shkak se një ngarkesë e plotë nga Kina në ShBA do rreth dy javë efektet do të vërehen të plota pak më vonë.
Ekonomia dhe zinxhirët e furnizimit që e lejojnë atë të funksionojë, mund të përshtaten mjaft shpejt ndaj goditjeve të caktuara, duke përfshirë fatkeqësitë e motit dhe madje edhe një pandemi. Në fillim të mbylljeve të COVID-it, letra higjienike ishte në mungesë pasi amerikanët shpenzonin më shumë kohë në shtëpi dhe më pak në vendet e punës dhe shkollat. Problemi u lehtësua pasi prodhuesit rritën prodhimin, sistemet e transportit u përshtatën dhe ankthi i konsumatorëve u ul.
Por lufta tregtare e Trump është e ndryshme sepse është e paparashikueshme dhe e pacaktuar. Edhe nëse ai do të hiqte dorë nga tarifat nesër, Trump tashmë ka tronditur besimin global në krijimin e politikave ekonomike amerikane. Askush nuk mund të marrë me lehtësi vendime biznesi bazuar në atë që bën. Nëse Kongresi i kontrolluar nga republikanët nuk ndërhyn për të hequr shpejt aftësinë e presidentit për të vendosur detyrimet e importit sipas dëshirës, një përpjekje e dështuar deri më tani, edhe partnerët e huaj tregtarë që besojnë se kanë një marrëveshje me Shtetet e Bashkuara mund të jenë në rrezik të taksave të reja kapriçioze mbi produktet e tyre.
Tarifat nuk reduktojnë vetëm fluksin e mallrave që vijnë në vend; ato gjithashtu shkaktojnë një atrofizim të sistemit logjistik që lëviz produktet brenda, jashtë dhe rreth Shteteve të Bashkuara. “Më pak vëllim ngarkesash, më pak vende pune. Ky është rregulli këtu,” tha së fundmi Mario Cordero, CEO i Portit të Long Beach, duke përshkruar se si një në nëntë punë në rajonin më të madh të Los Anxhelosit lind drejtpërdrejt ose indirekt nga portet e tij.
“Komplekset e portit janë si gishti i vogël i këmbës suaj,” më tha Peter Neffenger, ish-komandanti i sektorit të rojes bregdetare që përfshin Los Anxhelosin dhe Long Beach. “Ti nuk mendon për të derisa ta thyesh një ditë dhe të kuptosh, “Unë nuk mund të eci”.
Ashtu si biznesi i transportit detar brenda dhe jashtë Los Anxhelosit, industria mbarëkombëtare e kamionëve po ngadalësohet, sepse shoferët kanë shumë më pak ngarkesë për të lëvizur. Pa mbërritur inventari ose në rrugë, bizneset e vogla do të ngecin; industritë më të mëdha do të tkurren; raftet do të jenë bosh.
Këtë javë, Trump fajësoi ish-presidentin Joe Biden, në vend të politikave të tij, për trazirat e fundit në Ëall Street. Ajo që po ndodh në Los Anxhelos sugjeron se, nëse ka ndonjë gjë, tregjet financiare ende duhet të vlerësojnë plotësisht se sa lufta tarifore e Trump po e dëmton ekonominë. Tregu i aksioneve shkon lart e poshtë. Treguesit detarë vazhdojnë të fundosen./The Atlantic
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
