.png)
Nga Gazeta ‘SI’ – Ndonëse skema shtetërore e pensioneve ‘po vdes’, ajo private nuk është ende në lupën e shqiptarëve.
Sipas të dhënave nga Autoriteti i Mbikëqyrjes Financiare, për tre muajt e fundit të 2024-s, numri i anëtarëve në tregun e pensioneve private u rrit me më pak se 1 mijë, në 44.3 mijë anëtarë në total. Në një vit numri i anëtarëve është shtuar me 6 mijë.
Asetet e tregut kapën vlerën e 82.6 milionë eurove, me rritje prej 4 mln eurosh nga tremujori parardhës. Nga fundi i vitit 2023, tregu është zgjeruar me një ritëm të njëjtë me periudhat e tjera, rreth 15%.
Për të njëjtën periudhë, asetet e tregut arritën në 12.8 miliardë lekë, me rritje rreth 2 mld lekë në një vit.
Kompania Sigal dominon tregun në vlerë asetesh, mbi 3 mld lekë.
Në një kohë kur skema shtetërore e pensioneve po përballet me vështirësi, qeveria, ekspertët dhe vetë siguruesit kanë apeluar për investime në pensionet private, që njihet dhe si ‘kolona e dytë’ e skemës së sigurimeve.
Ligji i miratuar vitin e shkuar, synonte të nxiste interesin për këtë sektor, ku u ul kosto administrative në 2.5% nga 3% që ishte dhe rritja e vlerës së patatueshme. Po ashtu, pagesat që merr anëtari i fondit privat, nuk do të tatohen më si e ardhur personale, por do të tatohen vetëm për kthimin nga investimi, norma mbetet 15%.
Ndërkohë, qeveria ka disa muaj që rikujton se është në diskutime me Bankën Botërore për një skemë të re pensionesh, ku bashkë me vlerën e pensionit pritet të rritet edhe mosha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
