Nga Gazeta ‘Si’- Kreu i Grupit Parlamentar të Partisë Socialiste Taulant Balla, në një deklaratë për mediat, u pyet se çfarë do të bëjë Partia Socialiste, në rast se Partia Demokratike tërhiqet nga Komisioni për Reformën Territoriale dhe atë Zgjedhore.
Balla u shpreh se PS nuk shantazhohet asesi, duke i bërë thirrje opozitës që të bashkohet me Komisionet Parlamentare. Ai tha se Komisionet do të vijojnë normalisht punën dhe i bëri thirrje opozitës të reflektojë deri më datë 22 janar kur nis sesioni i ri parlamentar.
“Opozita duhet të reflektojë sa i përket qasjes që duhet të kemi në Kuvendin e Shqipërisë. Jemi 140 deputetë dhe secili duhet t’i bindet interesit të Shqipërisë sot. Jemi në moment vendimtar drejt rrugës për në BE. Ne synojmë që të anëtarësohemi brenda vitit 2030. Kushte, kërcënime, shantazhime, bojkotime me histori komisionesh nuk ka. Ata do shohin punën e vet e ne tonën. Besoj se emocionet do u kalojnë pas gjelit të detit dhe bakllavasë.
Nëse prishin dakordësinë për të mos marrë pjesë në Komision dhe ne do respektojmë vullnetin e shqiptarëve. Pakica nuk na merr dot peng. Opozita të reflektojë për qasjen ndaj Kuvendit. Komisioni Zgjedhor dhe ai Territorial do vijojë punën. Jemi të gatshëm të vijojmë punën me opozitën, por nuk shantazhohemi”, tha Balla.
Në lidhje me zgjedhjen e Endrit Shabanit si Avokat i Popullit, Balla deklaroi se kjo ka qenë zgjedhja më e mirë e bërë ndonjëherë.
Sipas tij, gjashtë kandidaturat kanë qenë të Partisë Demokratike dhe se mazhoranca thjesht kishte votat për të zgjedhur.
“Endrit Shabanit i uroj shumë suksese. Avokati i Popullit duhet të zgjidhet nga votat e mazhorancës. Ky është rasti më i mirë i zgjedhjes së Avokatit të Popullit. Kjo sepse kandidaturat ishin propozuar nga Partia Demokratike. Unë kam thënë se kandidati nuk do të jetë i Partisë Socialiste. Unë kam thënë se ne do votojmë një nga kandidaturat që solli opozita. Adriatik Lapajt nuk i jap kurrë përgjigje”, deklaroi Balla.
Partia Demokratike ka dhënë sinjalet e para, të një tërheqje të mundshme nga diskutimet në komisione për reformën territoriale dhe atë zgjedhore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
